KOMANDA bilong Nesenel Kepital Distrik na Sentral Provins Divisen, Asisten Komisina bilong Polis (ACP) Anthony Wagambie Junior i tok strong long ol manmeri na pikinini i stap long Pot Mosbi siti na Sentral provins long givim rispek na kea insait long tupela wik bilong sori na tingim dai bilong namba wan Praim Minista bilong kantri Gren Sif Sir Michael Somare.

Nesenel Ekseketiv Kaunsil i makim tupela wik long kantri bai stap insait long haus krai bilong Gren Sif Sir Michael. Dispela tupela wik em long Februeri 26 i go inap Mas 12, 2021 na tupela de bilong Pablik Holide em Mande Mas 1 na Fraide Februeri 12, 2021.

Long Mande Mas 1, ACP Wagambie i tok NCD na Sentral provins i stap isi tasol taim sampela sitisen i krai go insait long Sir John Guise Stadium long givim rispek bilong ol long Gren Sif Sir Michael. Em i tok ol polis i stap raunim dispela eria na putim was long pablik taim ol i mekim ol pasin bilong givim rispek.

Tasol em i tok, long Unagi Oval long Gordons em narapela samting olgeta. Em i tok planti manmeri i bin bung long hap na wanpela grup insait long dispela hap i laik brukim wanpela stua bilong ol kongkong tasol polis i rispon kwiktaim na ranim ol dispela grup na stopim bagarap long kamap.

ACP Wagambie i strongim pablik olsem ol polis i apim mak bilong operesen bilong ol na ol i bai stap strong i go inap Mas 12 taim kasket bilong Gren sif Sir Micheal i go daun long graun.

Em i tok tenkyu long husat manmeri na pikinini i go soim rispek bilong ol na tu em i tok tenkyu long ol polis opisa bilong en long stap long wan wan ples na ol program na ektiviti i kamap gut.

“Mande i bin hat tru tasol ol polis i mekim gut wok bilong ol na mi laik ol i mas strongim dispela pasin i nap Februeri 12.

“Polis bai no inap givim sans long wanpela man o meri husat i laik bagarapim ol memba bilong pablik.

“Mipela olsem kantri i mas givim rispek long hanmak bilong  papa bilong mipela Gren Sif Sir Michael Somare. Mipela i mas bung wantaim olsem wanpela. Dispela em i bikpela laik bilong en olgeta taim,” ACP Wagambie i tok.

Rebecca Negere i raitim