Kwarentin o stap hait em i wanpela bikpela samting long stopim COVID-19 long i go i kam, Kontrola bilong PNG COVID-19 Nesenel Pandemik Rispons na Komisina bilong Polis, David Manning i tok.

Namel long ol namba bilong COVID-19 long PNG i go antap na ol ripot bilong nupela COVID-19 i kam, Mista Manning i singaut long olgeta manmeri na pikinini long bihainim 14-de kwarentin lo we Nesenel Kontrol Senta i putim long olgeta pasindia husat i raun kam insait long kantri.

Mista Manning i tok tu olsem bai no gat kwarentin long haus bikos planti lain i pulap long haus. Tasol sapos i gat sampela medikol risen kwarentin long haus i ken kamap.

Mista Manning i tok, taim autbrek bilong COVID-19 i kamap long las yia, lo bilong kwarentin long COVID-19 rispon i painim tupela man wantaim COVID-19.  

“Kwarentin em i wanpela bikpela lo we mipela i yusim long abrusim na daunim COVID-19 long kantri olsem na mipela i mas bihainim gut ol lo bilong kwarentin,”em i tok.

Em i tok nau yet ol narapela kantri i wok long ripotim ol keis bilong nupela COVID-19 we PNG i no gat long en na kwarentin em i wanpela rot tasol long abrusim dispela nupela COVID-19 na pasim rot bilong en long kam insait long kantri.

“Mipela i gat ol manmeri na pikinini husat i kam long PNG long ol kantri we i gat dispela nupela COVID-19 sik olsem na mipela i mas lukautim ol pipel bilong mipela bikos dispela nupela COVID-19 em i strong moa long COVID-19 i stap pinis long en,” em i tok.

Em i tok long nau taim, namba bilong ol lain i stap long kwarentain long wan wan de em i namel long 30 na 60 na planti bilong ol em ol lain i kam long ovasis.

I gat tripela kain kwarentin we ol i wok long bihainim. Em long haus, hotel na ples we kampani i tok orait long en. Ol lain husat i stap long ol hotel na ples we kampani tok orait long en em ol yet i save baim. Tasol ol lain husat i stap long haus em ol lain wantaim arapela sik.

I bin i gat planti lain kwarentin long haus tasol nau ol i stopim bikos long planti astingting olsem abyus.