BANZ taun long Jiwaka i gat nupela taun atoriti pinis na ol atoriti i gesetim pinis.

Ekting provinsel edministreta Stefan Wusik i wokim opisal lukluk raun bilong ol nupela taun atoriti memba long provinsal hetkwata long Kurumul las wik.

Ol sevenpela nupela posisen bilong taun atoriti em taun menensa, deputi taun menensa, akaunten, fisikal plena, helt inspekta, ekseketiv opisa, na edministretiv opisa.

Fisikal plena Mathew Payakali i tok olsem ol nupela atoriti memba bai sindaun na makim graun na fisikal plening komiti we bai i wok bihainim lo bilong Fisikal Plening Ekt na Jiwaka Provinsal Graun na fisikal plening bod long divelopim taun.

Deputi taun menensa Andrew Kumie i tok olsem dispela em i wanpela gutpela nius na driman bilong ol papa i kamap tru.

"Kain taun olsem Banz we i gro bikpela wantaim bikpela populesen i nidim kontrol mekenisim long kamapim gutpela taun plening.

"Planti wok i stap. Mipela bai edvetaisim ol posisen.

Hoffman Gulgarye i raitim

"Atoriti i nidim sapot bilong olgeta stekolda long plenim na divelopim taun bilong yumi.

"Nau Banz bai kamap wankain olsem Kundiawa, Goroka, Kimbe na Alotau.

"Mipela olgeta mas amamas na wok bung wantaim long groim taun bilong yumi," Mista Kumie i surukim tok.