IS SEPIK Provinsal Gavman las wik i givim baset bilong en i go long Tresera, Ian Ling-Stuckey bihain long em i pinisim ol onlain input long kompyuta.

Dispela em i bikpela baset tru winim bilong las yia, Gavana Allan Bird i tok.

“Las yia baset bilong mipela em i bin K234.5 milien. Dispela yia baset em i K368.5 milien. Dispela em i soim olsem stat long 2018 baset i suruk i go antap long mak bilong K134 milien,” Gavana Bird i tok.

Tasol Gavana Bird i tok kain sais provins olsem Is Sepik, gavman bilong em bai i nidim K800 milien long sapotim gut ol sevis na wok divelopmen long provins.

Ol hap we i kisim moa luksave long baset em pe bilong ol tisa na tu holide pe bilong ol na egrikalsa prodaksen.

Gavman bilong Is Sepik i mekim edukesen namba wan praioriti long baset wantaim 50 pesen olgeta long baset o mani mak K115.2 milien.

Ol arapela eria we i kisim luksave long baset 2021 em Infrastraksa (23 pesen) Edministresen (22 pesen) na lo na oda, meri, yut, spots na kalsa. Ol wok bilong bungim ol wokmanmeri na ol olpela memba tu i kisim luksave.

Baset i soim tu olsem gavman aninit long lidasip bilong Allan Bird i bungim olgeta mani i stap yet long las yia baset na karim i kam long nupela yia na putim i go insait gen long baset bilong dispela yia. Long dispela yia mani i kam long dispela rot em K34,090,764.

Ol arapela rot we Is Sepik Gavman i kisim mani bilong en em long Nesenel Gavman, Pablik Invesmen Program (PIP), na takis.

Aninit long dispela baset rifom Is Sepik Gavman i lukluk tu long mekim senis long ol mani bilong Infrastraksa Menesmen. Dispela bai i lukim ol LLG i kisim K600,000 long trenspot infrastraksa na bilding mentenens. Olgeta LLG bai i wok bung wantaim ol Distrik Divelopmen Atoriti (DDA) na kamapim foapela projek we ol bai i mentenim na pinisim long pinis bilong dispela yia.

Sampela DDA  i laik givim hap mani long ol LLG long pasin bilong wok bung na kamapim gutpela piksa bilong wok. Sampela DDA i makim pinis ol mani mak namel long K200,000 na K500,000 long wan wan LLG.