POLIS Komisina na Kontrola bilong Nesenel Pandemik, David Manning i nau stap long aisolesen wantaim tupela famili memba bilong en bihain long COVID-19 test risal bilong ol we i kam bek long Sarere i soim olsem ol i gat COVID-19.

Tasol Mista Manning i no guria long dispela risal bikos em i save olsem em bai kisim COVID-19 yet bikos long wokmak bilong en olsem Kontrola.

“Mi inap long kisim dispela sik nau yet o bihain tu bikos long wokmak bilong mi olsem Kontrola we olgeta taim mi stap klostu long dispela sik.

“Long bihainim lo bilong COVID-19, mipela i nau stap long aisolesen. Ol medikol tim bilong Nesenel Dipatmen bilong Helt tasol bai inap long kam lukim mipela.

“Ol sevelens na monitaring tim bilong NDOH i statim pinis kontek tresing. Ol lain manmeri husat mi bin pas wantaim i no long taim i go pinis bai kisim test bilong COVID-19 tu,” Mista Manning i tok.

Mista Manning i no pilim sik o soim sain bilong COVID-19 tasol test risal bilong en i soim olsem em i gat COVID-19. Olsem na long lukautim em yet na famili bilong en, em bai go stap long aisolesen na i go het long mekim wok olsem Kontrola na Polis Komisina.

Em i tok olgeta taim em i save toktok strong long ol sitisen bilong Papua Niugini long i go kisim test bilong COVID-19 na ol i ken save long risal bilong ol na banisim ol famili bilong ol.

“Mi wok long tokim ol pipel long i go kisim test, na olsem Kontrola, mi yet tu i bin go na kisim test. Mi amamas olsem mi kisim test pinis na nau mi ken lukautim ol famili bilong mi.

“Mi strongim olgeta long go long haus sik stap klostu long yupela na kisim test. Taim yu save long risal bilong yu, bai yu inap long lukautim ol lain yu save laikim long en olsem ol lapun na ol arapela husat i gat sik long bodi.

“Noken pret. COVID-19 em i wankain olsem kus tasol em i faivpela taim moa bikpela na i save stap longpela taim moa long kus. Yu bai no inap wetim taim bilong yu long dai taim yu kisim COVID-19. Ol ripot i soim olsem planti manmeri na pikinini husat i kisim COVID-19 i pilim orait ken na i no gat moa COVID-19 long bodi bilong ol,” Mista Manning i tok.