OL 35 manmeri husat i stap insait long wanpela woksop bilong Lukautim Pikinini long Daiosis bilong Lae i mekim komitmen bihain long woksop long kamap man na meri bilong kamapim senis long komyuniti.

Ol i laik stap insait long pasin bilong givim save, edvoket, na kamapim awenes bilong lukautim ol pikinini long ol kainkain abyus na tu stopim ol abyus long kamap long ol pikinini.

Planti bilong ol dispela 35 lain i kam long woksop em ol tisa insait long ol Katolik ejensi skul. Ol arapela em ol kodineta bilong Family Life, ol Sande skul tisa, ol yut, ol lain bilong kamapim senis na ol viles kot mejistret makim maus bilong ol nainpela distrik long Morobe provins.

Dispela woksap i stat wantaim amamas bilong Holi Yakaris na toktok bilong Bisop bilong Lae Daisosis Most Reveren Rozario Menezes SMM.

“Long olgeta hap long wol, sios i kamap tudak bikos long abyus na planti kusai. Taim yumi stap long dispela graun em i wokmak bilong yumi long lukautim ol pikinini bilong yumi. Em i proses bilong laip na i no bilong wok mani,” Most Reveren Rozario Menezes SMM i tok.

Dispela 5-pela de woksap i trenim ol voluntia long save long Lukautim Pikinini Ekt 2015 na Polisi bilong Sios long Lukautim Pikinini long PNG. Ol i lainim tu long rispon, edvoket, givim save na tu ripotim ol keis bilong abyus long ol pikinini insait long ol Katolik ejensi skul na  Daiosis bilong Lae. Na long kamap mausman na meri na gutpela sitisen bilong kamapim gutpela famili, komyuniti, sios, school na PNG bilong ol pikinini.

Lukautim Pikinini Opis bilong Daiosis bilong Lae wantaim Right Relationship insait long Ministry ov CBC PNGSI i go pas long lukautim dispela woksap.