FOOD and Agriculture Organization (FAO) i wokbung wantaim ol arapela UN na NGO patna long sapotim Tari-Pori distrik long Hela Provins long taim bikpela pait i kamap.

Hela Provinsal Gavman, United Church long Hela Rijon (UCHR), Katolik Daiosis, Ivanjelikol Sios bilong PNG wantaim ol arapela praivet sekta tu i sapotim ol komyuniti we i kisim bikpela hevi long taim bilong pait.

Ol i givim ol samting olsem haus, kaikai, wara, senitesen na ol marasin long ol.

Long taim bikpela pait i kamap FAO i kwiktaim tru serim kaikai olsem, rais, tin abus, wel na sol long ol komyuniti i kisim bagarap. Ol i givim  fres gaden kaikai olsem, kaukau, kerot, frut na kumu i kam yet long Sid Maltiplikesen program bilong em wantaim lokal patna UCHR.

Ol arapela sapot i kam long ol arapela UN Ejensi em Helt bokis i kam long UNICEF, Spesel kit bilong ol mama na ol yangpela meri i kam long UNFPA, Imejensi rispons i kam long UNDP, Biomass stov i kam long UN Women, Kontena bilong wara i kam long IOM, Blanket na mat i kam long ICRC, Spun na plet bilong kaikai i kam long World Vision na DFAT i givim ol marasin bilong klinim wara wantaim ol kontena wara.

ExxonMobil PNG, MAF na Hevilift i bin helpim long karim ol dispela samting i go long Tari.

“Mipela i lukluk long sapotim ol lain husat i kisim bikpela hevi  na lusim ol ples bilong ol bikos long bikpela pait i kamap, ” FAO Program Kodineta bilong Tari i tok.

Gavana bilong Hela, Philip Unidalu i stretim toktok  wantaim ol traib na ol i kisim bel isi pinis. Em i tok tenkyu long olgeta patna husat i bin givim helpim kwiktaim long ol pipel.