“Ol pipel bilong PNG husat i stap long ol rurel ples i mas kisim sevis long ol komyuniti bilong ol,” Minista bilong Egrikalsa na Laipstok, John Simon i tok.

Minista Simon i mekim dispela tok long taim em stap long wanpela bung long Kanome stesin long Sialum, Tewai long Morobe Provins.

Long dispela taim, aninit long Prais sapot na Intavensin program, Minista Simon i bin givim K300, 000 long divelopmen bilong laipstok, kofi na kakao.

Memba bilong Tawai na Siassi na Vais Minista bilong Fiseris Dokta Kobby Bomareo na Gavana Ginson Saonu i bin welkamim Minista John Simon na Menesing Dairekta bilong LDC, Terry Koim long dispela bung.

Ol i kalap long helokpta na go long Kanome stesin na lukluk raun long bikpela graun na ol kain kain wel enimal long Sialum eria.

Bikpela astingting bilong dispela wakabaut em long sapotim Sialum long kamapim gut laipstok divelopmen long eria. I gat fam bilong ol sipsip i stap tasol nogat rot bilong karim i go long maket.

Long taim Minista Simon i givim K100, 000 sek mani i go long ol Bulmakao fama asosiesen, em i tokaut olsem LDC i gat plen long sanapim haus bilong lukautim ol fam enimal olsem sipsip, pik, hos na moa long Kanome stesin.

Bikpela hevi nau long eria em rot bilong go long maket. Minista Simon i tok Egrikalsa Dipatmen i traim hat long luksave long ol salens ol fama i gat na stretim bilong mekim isi long ol.

“Sevis long ol komyuniti long rurel eria em namba wan samting tru long dispela taim. Mi askim ol fama long go het na lukautim ol fam bilong ol na larim gavman i mekim sait bilong em long bringim sevis long ol,” em i tok.

Em i moa tok olsem, em bai wok klostu wantaim gavman long bringim isi ekses long karim ol prodak bilong fam i go ausait long Sialum na ol arapela distrik na provins tu.

Long dispela taim, lokal memba i go het long sapotim divelopmen bilong egrikalsa na long wankain taim Gavana Saonu tu i givim K50, 000 i go long divelopmen bilong laipstok long Sialum.