WOK bung i bikpela samting long lukim ol wok divelopmen i kamap long ol distrik, Usino lokal level gavman (LLG) presiden Pewa Aimai i tok.

Aimai i singaut long ol wod kaunsil na ol LLG presiden long distrik ol i mas gat wanpela tingting na wok bung wantaim.

Em i mekim dispela tok long taim Usino Bundi Memba Jimmy Uguro i wok hat long kamapim ol gutpela senis long distrik.

Usino Bundi long dispela taim i wanpela long ol namba wan top 5 distrik long kantri long lukim ol gutpela divelopmen i kamap.

Em i tok Madang Provins na kantri wantaim i save lukim Usino Bundi distrik olsem wanpela las distrik tasol wantaim kamap bilong Uguro, distrik i lukim planti gutpela senis long wok bilong helt, edukesen, infrastraksa na ol arapela wok.

Mista Aimai i singaut long ol arapela tupela LLG presiden long distrik em Bundi na Gama LLG long wok bung wantaim Memba na kamapim ol wok.

Em i mekim dispela singaut i no long taim i go pinis long Ramu Suga taun long ai bilong Minista bilong Edukesen na MP bilong Usino-Bundi distrik, Uguro taim em bin i go raun long distrik.

Aimai i tok ol LLG presiden mas wok bung na sekim ol divelopmen plen bilong distrik na wok klostu wantaim DDA na opis bilong Memba long  muvim distrik i go fowat.

Long wankain taim, Aimai i helpim ol mama grup insait long Usino LLG wantaim ol masin bilong samapim klos.

Em i helpim tu long baim ol rais masin long givim ol fama long LLG long mekim wok egrikalsa aninit long rais projek program.

Dispela mani i kam long royalti mani em LLG i kisim long Ramu nikel/kobalt projek long distrik.

James G. Kila i raitim