PAIA i kukim na kilim i dai tupela yangpela pikinini man bilong wanpela tisa man na bagarapim haus long Anglimp Sekenderi Skul long Jiwaka provins las wik Fraide, Februeri 19.

Ol lokal manmeri na komyuniti lida wantaim ol famili bilong ol arapela tisa i bin kirap nogut long lukim samting i kamap. Ol i stori long ol kriminol investigesen divisen (CID) polis bilong Jiwaka na PNG pawa tim olsem paia i kamap long nait taim olgeta manmeri i slip.

Wok painimaut i go het yet bikos i no gat wanpela ai witnes.

Nem bilong tupela yangpela pikinini em Pio Jika na Mark Jika husat i gat 8 na 6 krismas.

Papa bilong tupela em Peter Jika bilong Kupkap viles long Not Wagi ilektoret.

Ol neiba i tok Mista Jika em i  wanpela sinia tisa long skul na em wantaim meri bilong em na ol famili i no stap long haus wantaim tupela boi taim paia i kukim haus na kilim tupela i dai.

Ol CID wantaim ol famili i kamap long skul graun long Sarere moning na kisim bodi i go lusim long Mt. Hagen Jenerel haus sik mog. Dokta bai i ken wokim pos motem bihain.

Paia i kukim na bagarapim bilding we i gat tupela haus tisa, haus bilong Mista Jika na Mista Jesse Morgan.

Mista Morgan tu i no bin stap taim paia i kamap.

Wanpela yangpela man we i bin rausim hap lewa na bel bilong tupela yangpela boi i tokim Wantok Niuspepa olsem ol i kamap leit long sevim laip na haus.

Provinsal Edukesen BoD Deputi Siaman na Bod Memba bilong Anglimp Sekenderi Skul Mista Paul Pap i tok dispela hevi i bikpela tru na i givim sok long ol.

Em i givim tok sori bilong em i go long Mista Jika na ol famili bilong em.

Mista Pap i tok skul BoD na edmistresen aninit long lidasip bilong prinsipal George Rambang i baim tupela kofin bokis pinis bilong tupela bodi.

"Tupela boi i dai insait long skul eria na mipela i sori tru.

"Mipela i lusim long han bilong ol polis na pawa man long karim aut wok painim aut bilong ol na tok aut wanem rot paia i kamap," Mr. Pap i tok.

Hoffman Gulgarye i raitim