MINISTA bilong Jastis, Bryan Kramer i tokaut olsem moa long 5,250 Viles Kot wok lain long Papua Niugini no stap long peirol bilong Gavman stat long yia 2015 i kam inap nau.

Na long dispela yia 2021 em ol dispela lain i no stap long baset Gavman i kamapim pinis.

Minista Kramer i tokaut tu olsem sapos Gavman i putim nem bilong dispela 5,250 Viles opisal em bai Gavman i nidim samting olsem K24 milien long peim ol.

Minista Kramer i bin tokaut long dispela taim em i givim toktok long ol jenelis long Madang.

Em i tok klia olsem dispela K24 milien em i no karamapim ol potnait i go pinis. Em mani bilong statim ol o pei ol bai kisim bilong dispela yia tasol stat long mun Janueri i go Disemba.

Mista Kramer i tok Gavman i pasim baset bilong en pinis, na dispela baset i no luksave long pei bilong ol Viles Kot lain.

Tasol Minista Kramer i tok em bai tokim ol Viles Kot opis long Mosbi long kisim nem bilong olgeta Viles Kot opisa long provins husat i no kisim pei, na tu ol lain husat i stap nating na wok long kisim alawens nating, na tu sekim husat i lusim wok na ol arapela husat i lapun na nid long ritaia o go malolo.

Bihain long dispela Mista Kramer bai go sindaun wantaimTresera, husat i lukautim mani bilong kantri na tu sindaun wantaim ol lain long Fainens Dipatmen na Personnel Menesmen long putim bek ol dispela Viles Kot opisa i go bek long peirol.

“Em i no wanpela isi wok, tasol mi statim proses pinis na hamas baset mipela i nidim na mi askim Viles Kot opis long Mosbi long kamapim ol woksop na singautim olgeta Provinsal Legal Opisa, husat i save lukautim Viles Kot long wan wan provins long kam sindaun wantaim mi na mi bai givim wok long ol,” Mista Kramer i tok.

Em i tok tu olsem ol lain long Viles Kot husat i no save wokim wok na stap nating em bai rausim ol, na ol rait lain husat i save hat wok tasol em ol bai kisim ol.

Mista Kramer i tok ol bai kamapim sampela woksop bilong ol Viles Kot opisa long ol i ken tokaut long wanem ol hevi o belhevi ol i gat na wanem ol nid bilong ol long mekim wok bilong ol.

Em i tokaut olsem viles kot em bikpela praioriti o eria em bai givim moa taim long helpim.

Mista Kramer i tokaut olsem taim em i kisim wok olsem Jastis Minista, namba wan askim em i mekim em bilong wanem as tru na ol viles kot lain i no kisim pei bilong ol? Tasol em i painimaut olsem long pastaim i bin gat 7-pela lain i save wok long wan wan distrik kot. Ol dispela lain em wanpela Distrik Kot mejistret, viles kot mejistret na ol pis-opisa. Ol dispela lain i save stap long peirol alawens.

Em i tokaut olsem long 2014 wanpela disisen i bin kamap na ol i apim namba bilong ol viles kot opisal wantaim foapela moa lain. Dispela i bin kamap long olgeta wan wan viles kot insait long PNG. Taim dispela i bin kamap em i apim namba bilong viles kot opisa i go 18,000.

Mista Kramer i tokaut olsem taim ol i wokim disisen long kisim foapela moa wok lain bilong viles kot, ol i no bin putim ol long peirol bikos gavman i bin sot long mani long dispela taim. Stat long dispela taim inap long tude em ol dispela foapela lain ol i kisim em olgeta i no kisim pei yet.

Minista Kramer i tok ol Viles Kot wok lain em ol namba wan lain tru husat i save kisim pen na las lain tru we nogat luksave i go long ol, tasol ol dispela lain tasol i save makim Gavman long stretim hevi bilong lo na oda na bringim belisi na amamas long ol rurel na viles komyuniti long PNG.