ROYAL Papua Niugini Konstabulari (RPNGC) bai tok welkam long nupela Polis Minista William Onglo long tumora Fraide 26 Februeri, 2021. William Onglo em i memba bilong Kundiawa Gemblog long Simbu Provins.

RPNGC bai welkamim em insait long wanpela pered long Bomana Polis Trening Kolis long Pot Mosbi.

William Onglo i bin kamap memba bilong Nesenel Palamen long 2017 Jeneral Ileksen. Em i kamap Minista bilong Polis long Disemba 20, 2020 bihain long wanpela liklik kebinet risafol  o senis insait long gavman bilong Marape-Basil.

Em bin stap olsem Minista bilong Difens long May 15, 2019 bihainim wanpela liklik senis insait long gavman bilong O’Neil-Abel. Na tu em i stap olsem Deputi Siamen bilong Ikonomik Afeas na em i wanpela memba tu bilong Imejensi Pemenen Palamenteri Komiti (EPPC) long Jun 2019 i go inap Septemba, 2020.

Em i bin wok olsem Minista bilong Eneji tu  long Oktoba 1 i go inap Disemba 18, 2020 bihain long liklik senis insait long gavman na em i wok olsem keteka o waspapa Minista bilong Haia Edukesen Risets, Saiens na Teknoloji long Novemba 16 i go inap Disemba 18, 2020.

Mista Onglo i tok, em bai lukluk moa long kisim tripela samting taim em i stap olsem Minista bilong Polis. Wanpela bilong ol em golden hensek o sekan polisi bilong ol memba bilong RPNGC. Dispela polisi em long luksave na mekim gut long ol polismanmeri husat i stap long mak bilong ritaia.