WANPELA polis yunit bilong Madang taun bai go long Karkar ailan long Sumkar distrik long helpim ol polis long ailan long mekim wok painimaut na holimpasim ol memba bilong wanpela nupela kain kalt grup husat  i wok long hait na kamapim ol pasin nogut na kilim nating ol lain long ailan.

Madang Provinsal Polis Komanda (PPC) Suprintenden Mazuc Rubiang i tokaut long dispela las wiken bihain long ripot em i kisim long dai bilong wanpela sumatin bilong Karkar Sekenderi Skul.

PPC Rubiang i tok ol i painim bodi bilong dispela sumatin bihain em i bin lus long tupela wik.

Mista Rubiang i tok nem bilong dispela sumatin em Kudud Kasek, na em i stap namel long 105 lain husat i go antap long maunten Kanagioi we maunten paia i stap long en. Taim ol i lukluk raun pinis na i laik go bek long ples ol i bungim sampela lain husat i bung pait long ol wantaim homed gan, katapel, bus naip na sarep. Ol arapela 104 sumatin i bin ranawe nabaut na go bek long ples bilong ol. Tasol Kudud em i bin lus long dispela taim.

Nius bilong Kudud i lus i go bikpela long ol ples na hauslain long Takia tokples eria long Karkar ailan.

Mista Rubiang i tok ol i painim bodi bilong Kuduk Kasek long maunten long ples Mom. Ol famili bilong em i karim em i go long Gaubin Luteran helt senta we ol dokta i mekim postmotem na tokaut olsem sampela lain i tanim nek bilong dispela sumatin na kilim em i dai.

Narapela samting ol i painimaut long bodi bilong dispela sumatin em ol lain i katim na rausim tang bilong em, katim yau bilong em na tu kamautim tupela ai bilong em.

Mista Rubiang i tok kain bagarap i kamap long bodi bilong dispela sumatin i soim olsem sampela lain wantaim kalt bilip i mekim dispela pasin long en.

Em i tok ol famili bilong dispela sumatin i planim bodi bilong em pinis, tasol polis bai go het yet long mekim wok painimaut  bikos ol i gat bilip olsem wanpela kalt grup i stap baksait long dai bilong dispela Karkar sekenderi skul sumatin.

PPC Rubiang i tok sori long famili bilong dispela sumatin husat i lusim laip bilong en na i askim strong tru ol pipel long Karkar ailan long helpim polis wantaim infomesen long holimpasim ol dispela kalt grup na stopim pasin nogut bilong ol.

James G. Kila i raitim