WANPELA bikpela plen bilong Jastis Minista, Bryan Kramer em long bringim nupela teknoloji olsem kompyuta wantaim intanet na WhatsApp long mobail fon long helpim wok bilong ol Viles Kot long Papua Niugini.

Minista Kramer i tokaut long ol tingting bilong em taim em go long ilektoret bilong em long Madang na i tokaut long ol plen bilong em long helpim Viles Kot.

Em i tok infomesen na teknoloji i bikpela tude long wol, Viles Kot i nid long gat kompyuta na intanet na rejistaim ol keis ol i harim na tu rejistaim ol miting bilong Viles Kot na salim i go long hetkwata long Pot Mosbi.

Em i tok, olgeta miting bilong Viles Kot i mas gat rekot bilong en na ol hetkwata i mas save hamas lain i stap long miting bikos ol Viles Kot opisa long ples i mas kisim poto bilong miting tu na salim i go long Mosbi olsem rekot.

Mista Kramer i tokaut tu olsem sampela tingting em i gat nau em long makim ol gutpela na strongpela pis opisa bilong Viles Kot long ples long kamap olsem risev polisman. Ol dispela lain bai werim polis yunifom na gat pawa long karimaut wok bilong givim samon na kontrolim Viles Kot long eria bilong ol.

Mista Kramer i tok em i skelim dispela tingting pinis wantaim Polis Komisina David Manning. Bai tupela i ken sainim wanpela memorandum ov andastending (MoU) na dispela wokbung i ken kamap.

Mista Kramer i tokaut olsem em bai singautim olgeta Provinsal Legal Opisa (PLO) long kantri long wanpela woksop na painimaut wanem kain ol hevi i bungim ol Viles Kot nau long kantri.

Em i tok bihain long woksop, ol dispela PLO i ken go bek na kamapim ol woksop na harim ol hevi bilong ol Viles Kot opisa husat i stap long komyuniti.

Taim ol PLO i kam long dispela woksap ol i mas kisim ripot long wanem ol nid tru bilong ol Viles Kot opisa na sapos ol i nidim kompyuta, trenspot na ol arapela nid long strongim wok bilong ol.

Mista Kramer i tok viles kot i stap aninit long ministri bilong em na wankain taim tu em i go pas long Lo na Oda Sekta long kantri na em bai wok klostu wantaim Polis Minista na Polis Komisina, Koreksinol Sevises (CS) Minista na CS Komisina long lukluk long lo na oda sekta long kantri.

JAMES G. KILA  i raitim