EDUKESEN Dipatmen i brukim ol rot bilong saspendim foapela prinsipal bilong ejensi skul
long Madang Provins, Madang Katolik Edukesen Opis i tok.

Madang Katolik Edukesen Edvaisa, Bruno Tulemanil i tok Dipatmen i mas bihainim ol ejensi
skul lo na mekim ol disisen.
Em i mekim dispela tok long dispela wik long taim Dipatmen i saspendim ol prinsipal long
las wik bikos Dipatmen i sutim tok long ol i rausim ol sumatin husat i no bin baim ol skul na
projek fi bilong 2021 skul yia long go long skul.
Em i tok em i no kisim wanpela toksave bipo long Dipatmen i bin go het long mekim kain
eksen.
Em i tok tu olsem em i no kisim wanpela wok painimaut ripot long soim sapos dispela ol sut
toktok i tru.
Ol foapela skul em Malala Sekenderi Skul, Holy Spirit Sekenderi (Bogia), Divine Mercy
Haiskul na Divine Mercy Praimeri Skul (Megiar, Sumkar).
“Inap nau mi no kisim wanpela ripot sapos dispela ol sut toktok i tru,” Tulemanil i tok.
“Mi kisim dispela ol toktok long rot olsem kain disisen i bin kamap.
“Ol skul em ol ejensi skul na i kam aninit long lukaut bilong mi tu.”
Mista Tulemanil i tok aninit long 1988 Sios na Edukesen Dipatmen agrimen, ol ejensi skul
bai go aninit tu long Dipatmen.
Dipatmen na sios bai wok bung wantaim long strongim edukesen sistem long kantri.
Em i tok kain ol rot Dipatmen i bihainim bai i no inap helpim long kamapim gutpela
edukesen sistem, moa long provins bilong em.
Em i askim Dipatmen long luksave long ejensi skul agrimen na bihainim dispela ol rot taim
em i laik mekim ol bikpela disisen.
Wantok Niuspepa i bin salim ol askim i go long Edukesen Dipatmen tasol i no bin kisim taim
em i go long prin.
Long wankain taim, Tulemanil i bin askim ol prinsipal bilong foapela skul long salim
“Justification” pas long watpo ol i rausim ol sumatin sapos dispela i tru, na long watpo ol i
mas kisim ol fi pastaim bipo long sumatin i go long skul.

Paul Zuvani i raitim