LAS wik long wanpela nius ripot Minista bilong Envairomen, Konsevesen na Klaimet Senis Wera Mori i
tok gavman bai i lusim K9 milien long klinim Sinivit Main long Is Nu Briten bihain long kampani, Niugini
Gold Limited i pasim wok na i go.

Mista Mori i tok kampani i no bin toksave long gavman na i pasim wok tasol na i go.
“Ol i kirap tasol na lusim olgeta samting i stap tasol na sampela dispela ol samting i no seif long ol pipel i
stap klostu,”Mista Mori i tok.
Klostu 50,000 pipel i stap arere long dispela main eria.
Wanpela yangpela komyuniti ektivis Duncan Gabi i tok, long dispela as na ol NGO i save toktok planti
long gavman i mas strong long ol kampani i mas givim plen bilong ol long hau ol bai i rausim ol pipia
bilong ol bihain long ol i pinis wok.
Gabi i tok dispela kampani i mekim planti mani pinis na i ranawe na nau gavman bai i karim hevi bilong
en long klinim ol pipia bilong en.
“Mipela i no laikim gavman bilong mipela i mas karim hevi bilong klinim pipia bilong ol raskol kampani,”
Gabi i tok.
Mista Mori i tok olsem Dipatmen bilong em i nidim wanpela kampani husat i save long wok bilong
rausim ol posin marasin olsem cynanide we i stap yet long main sait.
Em i tok dispela wok bilong klinim main bai i kisim tripela mun.
Sinivit Main i bin op long 2007 na em i bin mainim gol na silva.