CARITAS PNG i laik lukim manmeri i mas gat gutpela sindaun.
Em i laik lukim olsem ol pasin olsem gembling, humen trefiking (giaman na stilim man),

prostitusen (pasin pamuk), kisim na yusim ol marasin o drag nogut olsem “cocaine” na
marijuana i mas pinis.
Em i tok mani londering (paulim na salim o kisim bikpela mani i kam insait o i go aut long
kantri) inap lukim pablik mani bilong kamapim ol wok divelopmen bilong kantri inap lus we
dispela bai mekim manmeri i no gat gutpela sindaun.
Em i mekim dispela tok long taim kain ol pasin i wok long kamap bikpela long kantri.
Caritas PNG, han seketariet bilong Katolik Bisop Konprens (CBC) bilong Papua Niugini na
Solomon we i save promotim Pis na Jastis i tok tu olsem humen trefiking nau i kamap olsem
wanpela nomol samting. Em i tok laip bilong manmeri i nogat moa mining long em.
Em i tokaut long dispela ol hevi long taim em i givim ripot i go long Vatican Nius ejensi,
Fides, i no longtaim i go pinis.
Em i askim tu ol gavman ejensi olsem polis, Treseri, Leba Dipatmen, Fainens na Treseri,
Internal Revenu Komisin (IRC), ol benk na ol arapela lain ejensi we i pait egensim kain pasin
olsem long wok strong na daunim displea ol hevi.
Human Rights Watchdog (HRW), wanpela non gavman ogenaisesen long Asia Pasific Rijon i
tok pasin bilong vailens egensim ol meri (GBV) i bikpela tru long Papua Niugini.
Phil Robertson, deputi dairekta bilong HRW i tok PNG i wanpela kantri we i gat nem nogut
bilong daunim na bagarapim ol meri.
Em i tok maski kantri i pulap long netserel risos, sindaun bilong ol manmeri i no gutpela.
Em i tok pasin korapsen i wanpela as we i lukim sindaun bilong ol manmeri i no gutpela na
dispela i mekim kain ol pasin nogut i ken kamap isi.
Em i askim gavman long senis na wok strong long daunim dispela ol hevi.