MEMBA bilong Jimi Distrik long Jiwaka Provins na Minista bilong Komyuniti Divelopmen na
Rilijen Wake Goi i amamas long ol mani na komitmen Praim Minista James Marape i mekim
long divelopim Kol na Apa Jimi Konstituensi long Jimi Distrik.

Praim Minista James Marape i givim mani na mekim komitmen long divelopim Jimi i no
longtaim i go pinis taim em bin i go lukluk raun long Jiwaka Provins long opim hetwata
bilong provins.
“Praim Minista i bin go na givim sampela mani long kamapim provinsal kepital long en mi
kisim em i go long Jimi na em i go lukluk raun long Jimi. Em i lukim ples na ol manmeri na
pikinini na em i givim sampela mani long hai skul na helt senta long Kol tu. Olsem na mi laik
tok tenkyu long en.
“Em i givim K200,000 long Jimi Sekenderi Skul, na K200,000 long Helt Senta long Kol na rot
em ol lain long Woks Dipatmen i go mekim sevei pastaim bai ol i brukim kost i go insait long
baset bilong wan wan yia na bai rot i kamap. Nau ol i stat pinis long mekim sevei long rot,”
Mista Goi i tok.
Em i tok Jimi Distrik i gat planti Helt Senta tasol ples we Praim Minista James Marape i go
lukim long en em Kol olsem na em i givim mani long Helt Senta long Kol.

Rebecca Negere i raitim