MEMBA ilekt bilong Bogenvil Rijonal sia na pastaim Sif Ekseketiv Opisa bilong PNG Spot
Faundesen, Peter Tsiamalili Jnr i mekim tok promis olsem Memba bilong Palamen long ai
bilong Gavana Jeneral Sir Bob Dadae long dispela wik.

Em i mekim tok promis long taim Ilektoral Komisin i kisim ol rit i go bek long Gavman Haus
long Tunde.
Las wik, Bogenvil Provinsal Ritening Opisa, Jimmy Alwyin i tokaut long win bilong em
long bai-ileksen.
Tsiamalili i win wantaim 37,534 vot we dispela i 2744 vot moa long Pater Simon Dumarinu.
Pater Dumarinu i win wantaim 34,790 vot.
Bihain long tupela em Albert Pungahu, pastaim memba bilong Bogenvil Haus ov
Ripresentetiv husat i kisim 19,045 vot.
Ol arapela kendidet husat i bin resis long dispela sia em Llane Munau, wanpela meri kendidet
tasol, Peter Manuka na Ian Michael Mapya.
Provinsal Ritening Opisa, Jimmy Alwyin i tokaut long win bilong Tsiamalili long bikpela
kauning senta long Hutjena Sekenderi Skul long Buka.
Long wankain taim em i tok i no gat planti manmeri i kamap long vot.
Em i tok Komisin i gat nem bilong ol 200,000 manmeri husat inap vot.
Bihain long win bilong em, Tsiamalili i tok em bai wok wantaim Bogenvil Presiden Ishmael
Toroama long strongim ol wok i go long ailan i kamap independen kantri.
Simon Soheke Asisten Provinsal Ritening Opisa i bin helpim long ranim dispela ileksen.
Bogenvil sia i bin stap nating bihain long pastaim rijonal memba Joe Lera i risain long resis
long sia bilong Atonomus Bogenvil Gavman Presiden namel long las yia.
Ileksen i stat long 3 Desemba, 2020 we poling i bin kamap long Janeuri na kaunim vot i stat
long pinis bilong Janueri long dispela yia.

Nicky Bernard i raitim