JERRY Ubase, Deputi Seketeri Kopret na Reguletori Sevis long Dipatmen bilong Komyuniti
Developmen na Rilijen (DCDR) i nau kamap Ekting Seketeri bilong DCDR.

Posisen bilong Seketeri long DCDR i bin stap nating bihain long bipo Seketeri Anna Bais i
lusim na i ran long ileksen long sia bilong Mosbi Not Wes taim memba bilong Mosbi Not
Wes Sir Mekere Morauta i dai.
Minista bilong Komyuniti Divelopmen na Rillijen Wake Goi i tok em bin stap long ples long
Jiwaka taim em i kisim leta bilong Anna Bais long risain long wok na em i tok orait long Bais i
ken lusim wok na mekim wanem em i laik mekim.
Em i tok tu olsem bihain long Bais i lusim posisen, Nesenel Ekseketiv Kaunsil (NEC) i bin
makim Mista Ubase long ekting long dispela posisen tasol em i no tokaut hariap bikos em i
tok em i laik olgeta pepa wok na tok orait i mas kamap gut pastaim.
“Las wik ol NEC bin makim Ubase tasol mi wet liklik bikos mi laikim olsem ol geset pepa na
NEC pepa i mas kamap gut pastaim bihain mi ken toksave long pablik na bringim em i kam
insait long dipatmen,” Minista Goi i tok.
Mista Ubase i amamas long nupela wokmak NEC i givim long en na em i tok em bai no inap
senisim wanpela samting long Dipatmen tasol em bai go het long mekim ol wok we bipo
seketeri i kamapim na lusim na i go.
“Bikpela lukluk bilong mipela nau na bihain em long pinisim ol Distrik Komyuniti Divelopmen
Senta (DCDC) we bai mipela bringim olgeta program na ektiviti i go long distrik na komyuniti
level. Tripela senta i kamap pinis. Imbongu em pinis na memba bilong Imbongu i redi nau bai
mipela i go na opim. Gazel em 99 pesen pinis na Biala em 75 pesen pinis. Taim olgeta senta i
pinis bai mipela i go na karimaut olgeta program na ektiviti bilong mipela long distrik level,”
Ekting Seketeri Ubase i tok.
Tasol em i tok DCDR yet bai no inap long mekim. Ol i wokbung wantaim olgeta opis bilong
Gavman long kisim ol sevis bilong ol i go daun long distrik level we ol gavman sevis no inap
long i go daun na helpim ol pipel.
Dispela em namba wan wokmak em i laik mekim taim em i stap olsem ekting seketeri bilong
DCDR inap ol i painim o makim Seketeri tru bilong dipatmen.

Rebecca Negere i raitim