LONG dispela bai-ileksen bilong Bogenvil Rijonal sia, wanpela meri jenelis na muvi prodyusa Llane
Munau husat i bin resis tu i tokaut long sampela pasin em I bin lukim.

Em i laikim nesenel gavman i mas lukluk na stretim gut pasin nap roses bilong ileksen.
Em i tok em i bin kirap na mekim ol wok painimaut taim ol meri vota i askim em olsem ol vot bilong ol i
go we?
Mis Munau i askim, “Dispela ileksen i bin ran stret bihainim trupela pasin na proses bilong ileksen na i no
gat paul pasin i kamap?
Em i tok Nesenel Ilektorel Komisin i bin putim aut toksave olsem poling bai i ran long tupela wik. Tasol
long taim bilong poling dispela plen i bin senis na ol i holim poling long wanpela de tasol.
Bogenvil em i bikpela ailan wantaim ol draipela maunten na olsem wanem bai ol pipel i kamap long
poling eria hariap na vot?, em i askim.
Long sampela hap poling i bin hat long pinis long wanpela de na i kisim tupela de, Mis Munau i tok.
Em i tok, “Taim mi bin sekim bilong wanem na senis i kamap, mi bin kisim bekim olsem, ‘PNG Ilektorel
Komisin i traim wanpela nupela sistem bilong ranim ileksen na bai ol i ken yusim long Nesenel jenerel
ileksen long 2022.”
Em i tokaut tu olsem (Opis bilong Bogenvil Ilektorel Komisin) OBEC i bin makim 442 poling stesin tasol
Bogenvil i nogat 442 polis manmeri long was long dispela ol poling stesin. Sampela dispela ol poling
stesin i longwe tru long ol vota.
Mis Munau i tok em i tokaut long proses na ol pasin i kamap long dispela ileksen long helpim PNG
Ilektorel Komisin na OBEC long lukluk na plenim gut nesenel jenerel ileksen bilong 2022.

Rosa Koian i raitim