OPIS bilong PNG Ilektoral Komisin i tok wok bilong kaunim gen ol vot bilong Kandep
ileksen i stat long Tunde dispela wik.

Dispela em bihain long Nesenel na Suprim Kot Jas, Jastis Derek Hartshorn i tok nogat long
slip rul kot aplikesen bilong Memba nau Alfred Manaseh.
Mista Manaseh i bin mekim slip rul aplikesen bihain long em i tok kot i bin asua long tok
orait long kain kaunim i kamap.
Tasol Jastis Hartshorn i tok i nogat wanpela gutpela as na strongpela tok i stap long pasim
pastaim kot oda bilong kaun i mas go het.
Dispela i lukim kaun nau i go het long Kundiawa long Simbu Provins.
Wok bilong kaunim ol vot i kamap bihain long pastaim memba bilong Kandep, Don Polye i
kisim Manaseh i go long Kot-bilong-Dispiutet Riten na Kot i givim oda long komisin i
kaunim gen ol vot.
Long wankain taim, ekting Ilektoral Komisina Simon Sinai i tok opis bilong em i kisim tasol
K5 milien na i no K6 milien we opis bilong em bin i askim long en.
Em i tok opis bilong em i kisim ol balot pepa long Wabag polis stesin, Enga Provins na i go
long Kundiawa, Simbu Provins.
Sinai i tok bai gat gutpela sekyuriti long lukautim ol balot pepa long taim ol i stap long
Kundiawa Polis Stesin.
Em i tok Hailans Rijonal Polis Komanda, Joseph Tondop i strongim tingting bilong em olsem
bai gat gutpela sekyuriti long taim bilong kaunim ol vot.
Reveren Tom Sine i go pas olsem Ritening Opisa na Westen Hailans Ileksen Menesa Philip
Telape na Simbu Ileksen Menesa Antonia Nilkare i stap olsem ol asisten ileksen ritening
opisa.
Sinai i tok Opis bilong em i bin kisim oda long kisim ol risalt i go long kot bipo long 19
Februeri, 2021 tasol i luk olsem ol bai askim kot long surikim dispela de i go long narapela
de.
Em i tok dispela em tumora tasol na ol de bilong kaunim ol vot i sot.