MINISTA bilong Jastis Bryan Krammer i tok planti moa wok i mas kamap long daunim pasin
bilong stilim mani bikos dispela pasin tasol i mekim PNG kamap korap kantri long rijon.

“PNG em i wanpela bilong ol kantri long rijon we i gat bikpela mak bilong korapsen bikos
long ol hevi bilong paulim na stilim mani. Mi yet mi lukim long ai bilong mi insait long ol
wokpainim bilong mi olsem planti milien kina i lus nating insait long ol sistem bilong yumi. I
gat bikpela nid long planti wok i mas i kamap long dispela eria,” Mista Krammer i tok.
Minista Krammer i mekim dispela tok i no long taim i go pinis taim em i bung wantaim
Nesenel Kodineting Komiti (NCC) bilong Anti Money Laundering na Counter Terrorist
Financing long Waigani. Dispela em i namba wan taim long wanpela minista bilong kantri
PNG i bung wantaim NCC na toktok long ol.
Minista Krammer i tok i gat ol keis we sampela mani i bin lus insait long kantri na
wokpainimaut i no bin kamap yet long ol dispela keis.
Em i tok planti gutpela lain i redi long lusim wok na risain bikos ol i no laik long stap insait
long kain ol pasin bilong stilim mani tasol i gat ol wan wan lain husat i amamas long holim
wok bilong ol yet na stap insait long dispela stil pasin.
“Anti Money Laundering na Counter Terrorism Financing em i wanpela eria we mi laik lukim
gutpela wok i mas kamap. Planti asua i kamap long olgeta level olsem na korapsen em
bikpela stret insait long sistem bilong yumi,” Minista Krammer i tok.
Minista Krammer i tokim Komiti olsem dispela yia em bai wanpela interesting yia sapos em
stap yet olsem Minista bilong Jastis. Bikos em i tok em i laik wok i mas kamap.
“Mi bai lukluk gut long dispela eria na wokbung wantaim yu (NCC) long mekim wok, i no
long pepa wok tasol, tasol long holim ol manmeri husat i gat asua,” em i tok.
Astingting bilong NCC long daunim pasin bilong stilim mani na givim mani long teroris em
long lukluk long wok bilong Anti Money Laundering/ Financing ov Terrorism (AML/CFT) long
kantri.