NESENEL Kot i makim Memba bilong Madang Distrik na Minista bilong Jastis, Bryan
Krammer long kamap siaman bilong Madang Distrik Divelopmen Atoriti.

Mista Krammer bai go pas long stretim na mekim wok mentenens long ol rot insait long
Madang taun stat long Baidal Rot i go olgeta long Madang sip bris.
Dispela em namba wan oda i kam long Nesenel Kot na Suprim Kot Jas Jastis David Cannings
long Janueri 4 2021, taim em i holim wanpela Kot long Madang long stretim ol bagarap rot
long Madang town.
Bihain long dispela, Mista Krammer i kamapim wanpela komiti bilong stretim rot we em yet i
siaman na bai ol i bung long olgeta tupela mun long lukluk na toktok long karimaut ol oda i
kam long Kot.
Bryan Krammer i tok, em i wokmak bilong Provinsal Edministresen long mentenim na
stretim ol rot insait long Madang taun tasol ol i feil na ol i no inapim dispela wokmak bilong
ol.
“Kot i makim mi long i go pas bikos Provinsal Edministresen i no inap long mekim wok bilong
en. Na sapos Kot i no makim mi, Edministresen bai go het yet long feilim ol pipel bilong
Madang,” Mista Krammer i tok.
“Mi amamas long toksave olsem wok i stat pinis long stretim ol rot insait long taun. Olsem
oda i tok, plen i bin stap pinis bipo long mipela i bin go long Kot. Na Kot i bin givim tok orait
na i sapotim ol eksen we bin i kamap pinis.”
Mista Krammer i tok, insait long dispela wok bilong stretim rot, ol i bai wokim gutpela baret
bilong wara long ran na ol i bai stretim na putim kolta long rot gen.
“Mi laik dispela wok bai pinis long Jun o nogat i ken pinis klostu taim,” Bryan Krammer i tok.

Rebecca Negere i raitim