POLIS bai mekimsave long yu husat Madang asples lain o papagraun i kisim na lukautim ol lain we polis na
buldoza i rausim ol long eviksen we i kamap long Luteran misin graun long Nagada plantesen sampela wik i
go pinis.

Madang Provinsal Polis Komanda, Suprintenden Mazuc Rubiang i givim dispela strongpela toklukaut bihain long
sampela ripot polis i kisim pinis olsem sampela asples lain klostu long Nagada i wok long kisim ol lain bilong Hailans
rijon we polis i rausim ol pinis long Nagada bihain long bikpela eviksen na givim ol eria long ol i wokim haus gen na
stap.
Em i tok olsem polis bai muv i go insait long ol lokal ples na mekimsave long lain eviksen long Nagada i rausim pinis
long en na ol i muv i go stap long nupela ples. Polis bai mekimsave tu long husat lokal Madang asples man husat i
kisim ol lain na givim eria o ples long ol i sindaun.
PPC Rubiang i tokaut olsem polis bai muv long mekimsave long ol asples lain taim wanpela komplein o taim ol i
kisim leta we komyuniti i no wanbel na i no amamas long stap bilong ol dispela lain.
PPC Rubiang i tok dispela ol lain husat eviksen long Nagada i rausim ol i ken bringim hevi long ol lokal viles kot long
Madang taim ol asples lain i sore na kisim ol na lukautim. Ol dispela lain bai muv i go kam na yusim wara, graun na
tu arapela samting long komyuniti na dispela bai kamapim belkros na hevi.
Bikpela eviksen we i kamap tupela wik i go pinis i rausim moa long 3000 pipel husat i wokim haus na planim ol diwai
na kainkain plaua long Nagada plantesin.
Tasol ripot i kamaut olsem sampela ol dispela ‘refuji’ o lain eviksen i rausim ol i wok long hait na go bek gen long
Nagada na hait na dring bia na mekim nois na kainkain pasin long hap.
PPC Rubiang i tokaut olsem ol polis man bilong em husat i patrol na was long Nagada eria i holim pasim na sasim
9pela man husat i wokabaut raun i stap long eria we eviksen i bin kamap pinis long en long posen 70.
Em i givim strongpela toklukaut i go long ol lokal papagraun long Madang husat i stap klostu long Nagada olsem ol i
mas no ken tru givim eria o graun long dispela ol lain bilong Hailans na Momase rijon husat eviksen i rausim pinis.
Em i givim toklukaut tu olsem ol lokal pipel bilong Madang husat i ran long kar i mas putim was gut taim ol i ran i go
insait long eria we evikesen i kamap long en. Dispela em bikos sampela lain i ken hait na tromoi ston long ol.

By James G. Kila