OL pipel i mas bihainim lo bilong raun long solwara long abrusim taim nogut, Operesen
Menesa bilong Pacific Towing, Gerard Kasnari i tok.

Mista Kasnari i mekim dispela tok bihain long 14 manmeri na pikinini i bungim taim nogut
long solwara na ol kru bilong wanpela sip bilong Pacific Towing ol i kolim Yomba i bin helpim
ol dispela lain, i no long taim i go pinis.
Kasnari husat i bin go pas long dispela imejensi reskiu na i toktok wantaim Search na Rescue
divisen bilong National Maritime Safety Authority (NMSA) i tok ol dispela 14 lain we Yomba i
sevim i laki tru long stap laip.
“Ensin bilong ol i bin bagarap na ol i bin drip antap long solwara long tupela de. Mi no save
hamas moa de ol bai stap laip long solwara,” Mista Kasnari i tok.
Em i tok dispela kain ol taim nogut i save kamap long solwara planti taim. Ensin bagarap, bot
i pulap tru, no gat laip jaket, petrol i pinis, o ol opereta o skipa i spak.
“Ol pipel i mas opim ai na tingting na kisim was. NMSA i gat gutpela tingting na risos long
websait bilong ol. Mipela i mas bihainim lo bilong raun long solwara na stap seif,” Kasnari i
tok.
Sip bilong Pacific Towing, Yomba, i bin bungim dispela banana bot wantaim ol pasindia
bilong en long 36 Notikol Mail Not-Is long Madang na 15 Notikol Mail Saut-Is long Bagabag
Ailan. Ol i kisim olgeta 14 pasindia long sip na givim kaikai long ol, larim ol waswas long
hatwara na karim ol i go seif long Madang.
Kepten Kari Motu na ol 7-pela kru memba bilong en laik i go long wanpela projek long Wel
na Ges kastoma bilong ol long Simberi Ailan taim ol i bin bungim dispela banana bot i drip
antap long solwara namel long 2 na 3 klok moning. Kepten Motu i toksave long Hetkwata
bilong Pacific Towing long Pot Mosbi na ol i helpim ol dispela 14 lain i go bek long Madang.