I GAT planti toktok long ol midia ovasis olsem European Union (EU) i  pasim rot bilong salim COVID-19 veksin I go aut long ol arapela kantri ausait long Yurop.

EU delegesen long Pot Mosbi i tok klia olsem EU i no pasim ekspot. Em i bihainim wanpela tok orait bilong sotpela taim tasol, bihainim sampela rul bilong ekspot aninit long Regulesen 479 bilong 2015.

EU i tok dispela i no min ol i pasim ekspot bilong marasin i go long ol arapela kantri.

Dispela i sut stret long ekspot bilong COVID-19 marasin we wanpela Advance Purchase Agrimen (APA) i stap pinis wantaim EU. Dispela ol ekspot bai i kamap bihain long ol i givim toksave hariap pastaim long ol i laik ekspot, na long taim ol i kisim tok orait pinis bai ol i ken ekspot i go aut long Yurop.

Dispela mesa i stat long 30 Janueri 2021 na bai i go inap 31 Mas 2021.

EU i toksave tu olsem ol bai i no inap ekspotim planti COVID-19 marasin aninit long dispela agrimen. Olsem na ol ekspot i go long ol liklik kantri (bihainim sais bilong ikonomi bilong ol), na PNG em wanpela bilong ol, i no stap insait long dispela agrimen. Agrimen i tok; ol ekspot i go long ol 192 liklik sais kantri insait long COVAX Advance maket komitmen lista na ol ekspot bilong COVID veksin we ol i baim na i kam olsem long COVAX, UNICEF na PAHO bilong go long ol kantri we i wok bung wantaim COVAX na ol ekspot long rispon long imejensi.

Astingting bilong dispela mesa em long helpim long kisim COVID-19 veksin i go long ol pipel long EU hariap na tu long rausim pasin bilong hait na ekspotim ol veksin ausait long EU. EU i givim E2.7 bilien long sapotim ol wok bilong kamapim veksin bilong paitim COVID-19 hariap tasol, olsem na em i gat wok long banisim gutnem bilong dispela draipela mani i kam long en.