OPIS bilong PNG Ilektoral Komisin i tok em i bai go het long kaunim ol vot bilong Kandep ileksen.

Dispela em bihain long Nesenel na Supreme Kot Jas, Jastis Derek Hartshorn i tok nogat long slip rul kot eplikesen bilong Memba nau Alfred Manape.

Mista Manape i bin mekim slip rul eplikesen bihain long em i tok kot i bin asua long tok orait long kain kaunim i kamap.

Tasol Jastis Harshorn i tok i nogat wanpela gutpela as na strongela tok i stap long pasim pastaim kot oda bilong kaun i mas go het.

Dispela i lukim kaun nau i go het long Kundiawa long Simbu Provins.

Pastaim memba bilong Kandep, Don Polye, i tok kain tok i no mas kamap na i lusim taim bilong ol pipel long distrik na long lukim ol i kisim gutpela sevis.

Long wankain taim, ekting Ilektoral Komisina Sinai i tok opis bilong em i kisim tasol K5 milien na i no K6 milien em opis bilong em bin i askim long en.

Em i tok opis bilong em i kisim ol balot pepa long Wabag polis stesin na i go long Kundiawa.

Sinai i tok dispela bai gat gutpela sekyuriti long lukautim ol balot pepa long tai mol i stap long Kundiawa Polis Stesin.

Em i tok Hailans Rijonal Polis Komanda, Joseph Tondop i strongim tingting bilong em olsem bai gat gutpela sekyuriti long taim bilong kaunim ol vot.

Reveren Tom Sine bai go pas olsem Ritening Opisa na Westen Hailans Ileksen Menesa Philip Telape na Simbu Ileksen Menesa Antonia Nilkare i stap olsem ol asisten ileksen ritening opisa.

“Mipela i bin askim long kisim K6 milien tasol Treseri Dipatmen i givim mipela K5 milien tasol.

“Mipela bai kisim ol balot pepa i go long Kundiawa na kaunim ol long dispela wik.”

Sinai i tok Opis bilong em i mas kaunim ol vot na tokaut long risal bipo long 19 Februeri, 2021 olsem oda bilong Kot i tok.

Polye i kisim Memba, Alfred Manase i go long Kot-bilong-Dispiutet Riten na Kot i givim oda long kaunim gen ol vot.