PASTAIM Sif Ekseketiv Opisa bilong PNG Spot Faundesen, Peter Tsiamalili Jnr nau i nupela rijonal memba bilong Bogenvil.

Provinsal Ritening Opisa, Jimmy Alwyin i tokaut  long win bilong em long asde.

Tsiamalili i win wantaim 37,534 vot we dispela i 2744 vot moa long Pater Simon Dumarinu. Pater Dumarinu i win wantaim 34,790 vot.

Bihain long tupela em Albert Pungahu, pastaim memba bilong Bogenvil Haus ov Ripresentetiv husat i kisim 19,045 vot.

Ol arapela kendidet husat i bin resis long dispela sia em Llane Munau, wanpela meri kendidet tasol, Peter Manuka na Ian Michael Mapya.

Provinsal Ritening Opisa, Jimmy Alwyin i tokaut long bikpela kauning senta long Hutjena Sekenderi Skul long Buka.

Long wankain taim em i tok i no gat planti manmeri i kamap long vot.

Em i tok Komisin i gat nem bilong ol 200,000 manmeri husat inap vot.

I bin gat 410 poling tim we dispela i lukim 120 tim i bin stap long Saut Bogenvil, Not Bogenvil (172) na Sentral (118).

Taim provinsal ilektoral opis i kisim olgeta balot bokis bilong vot, praimeri kaun i bin kamap long ol komyuniti asembli na ol elimenesen kaun i bin kamap long rijonal ilektoral opis long Hutjena Sekenderi Skul Hol long Buka.

Asde tu em PNG ekting Ilektoral Komisina Simon Sinai i kisim ol rit i go bek long Gavman Haus long Konedobu.

Bihain long win bilong em, Tsiamalili i tok em bai wok wantaim Bogenvil Presiden Ishmael Toroama long strongim ol wok i go long ailan i kamap independen kantri.

Simon Soheke Asisten Provinsal Ritening Opisa i bin helpim long ranim dispela ileksen.

Bogenvil sia i bin stap nating bihain long pastaim rijonal memba Joe Lera i risain long resis long sia bilong Atonomus Bogenvil Gavman Presiden namel long las yia.

Sikspela kendidet i resis long dispela sia.