OLGETA lain bisnis haus na manmeri bilong kantri Saina husat nau i stap long PNG i wok long bisi stret long redi long Fonde apinun we Spring Festival o Luna Nu Yia bilong Saina bai stat.

Long Madang we bikpela maining kampani bilong Saina, Ramu NiCo Menesmen (MCC) i wok i stap em ol i bilasim fran long bikpela opis bilong ol long Madang taun ol i kolim ‘Glass Haus’ wantaim ol bikpela retpela lam. Wankain bilas em ol i mekim long Kurumbukari Main opis na long Basamuk Rifainer opis.

MCC Kopret Afes Menesa, Michael Guo i to klong Saina na ol arapela Saut-Is Esia  kantri ol i save putim ol retpela karamap bilong lam wantaim lait i stap insait long en long geit bilong ol haus o long eria long kot. Nau long dispela taim ol i save putim ol retpela lain tu insait long ol rum o ples slip.

China Spring Festival o Luna Nu Yia i save kamap long Februeri 12 long olgeta yia

Guo i tok klia olsem pasin na gutpela tingting we i bihainim dispela festival em olsem retpela kain na raunpela seip bilong lamp i save makim family i kam bung wantaim.

Guo i tok Saina i save yusim 12-pela enimal we i gat ol mining bilong en long luksave long Luna Nu Yia bilong ol.

Em i tok bulmakau em wanpela gutpela enimal na enimal bilong wok hat stret bikos em i save helpim long wok long egrikalsa long brukim graun long gaden taim ol i putim ol strongpela diwai long brukim graun long baksait bilong en long muv i go kam long wok.

Ox o kau i sanap makim gutpela pasin bilong wokhat, gutpela tingting na laki i stap wantaimem. Em gutpela sain long wok keria na bisnis. Sampela bisnisman long Saina i save laik putim kaving bilong kau o oks long tebol o desk bilong ol o sampela taim long geit o mausrot i go insait long haus bilong ol.

James G. Kila i raitim