DIPATMEN ov Edukesen i  sasim na saspendim prinsipol bilong 6-pela skul long Madang provins husat I no bin  bihainim instraksen o disisen bilongGavman long no ken sasim skul fi bilong  2021 skul yia.

Wanpela leta i kamaut long Opis bilong Seketeri bilong Edukesen, Dokta Uke Kombra we i tokaut long nem bilong ol skul long kantri Edukesen Dipatmen i saspendim ol prinsipel bilong skul bikos ol i no bihainim tok long Gavman Tuisen Fi Sabsidi.

Ol skul long Madang provins em gavman i sasim em Divine Mercy Catholic Day Sekenderi Skul, Megiar Praimeri Skul (Divine Mercy), Karkar Sekenderi skul, Holy Spirit Sekenderi Skul, Malala Sekenderi Skul na Tusbab Sekenderi Skul.

Nesenel Gavman i bin putim pinis K123 milien I go long akaun bilong olgeta skul long PNG, tasol ol dispela skul long Madang na ol arapela long kantri i no bihainim instraksen bilong gavman. Ol i tok strong long ol papamama long baim skul fi, na sampela i givim kain kain toktok long kisim mani long ol papamama.

Wankain sas na saspensen bai kamap long tripela skul long Nesenel Kapitol Distrik (NCD), tripela skul long Sentral provins, wanpela skul long Morobe na wanpela long Is Nu Briten provins.

Ekting Asisten Seketeri Skul Inspeksen i kisim toksave long salim tok i go kam wantaim olgeta Rijinol Dairekta na Sinia Skul Inspekta long lukim olsem ol dispela skul we i no bihainim instraksen i mas kisim sas yet na saspensen i mas kamap. Bihain ol i ken givim stori bilong ol bihain long taim bilong disaplin proses.

Ol sekenderi skul long arapela provins we ol prinsipel bilong ol i kisim sas na saspensen em Tokarara Sekenderi, Koiari Park na Butuka Academy (NCD), Mt Diamon Sekenderi, Sogeri Nesenel Hai Skul na Kemabolo Hai Skul (Sentral), Bugandi Sekenderi (Morobe) na Palmalmal Sekenderi (Is Nu Briten).

Nesenel Edukesen Dipatmen i saspendim prinsipel bilong Divine Mercy Katolik De Sekenderi Skul long las wik Fraide, Februari 5 na instraksen notis ol i givim long dispela wik. Saspensen notis bilong prinsipel bilong Malala Sekenderi Skul na Holi Spirit i bin kamap long las wik Fonde, Februeri 4, 2021.

James G. Kila I raitim