LONG planti mun nau, gavman bilong kantri Tanzania, long Afrika i wok long tok kantri i no gat dispela sik COVID-19, olsem na i no gat plen bilong kisim veksin bilong banisim dispela sik. Ripota bilong BBC,

Dickens Olewe i toktok wantaim wanpela famili hustat i stap long haus krai bihain long papa bilong i dai long taim em i kisim dispela sik. Kantri i pret nau olsem dispela sik i kilim planti moa pipel pinis.

LONG 21 Janueri, Peter (dispela i no nem tru bilong em) – i pinis wok na go bek long haus. Em i pilim nek i drai na em i stat long kus na i no inap testim kaikai. Wanpela wik bihain, famili bilong em i kisim em i go long haus sik, tasol em i dai wan aua bihain,

Peter i no bin kisim test bilong COVID-19 bikos gavman bilong Tanzania it ok kantri bilong ol “I fri long COVID-19.” Inap planti mun nau, gavman bilong ol i no givim infomesen long hamas pipel i kisim dispela sik na i dai.  

Gavman bilong Tanzania i no gat plen bilong veksinesen program bilong COVID-19.

Tude, i no i gat wei bilong tokaut luksave long hamas pipel tru i kisim dispela sik na gavman i makim liklik lain manmeri tasol long givim infomesen long dispela sik.

Ol toktok bilong gavman i mekim ol kain lain olsem meri bilong Peter i tingting planti. Ol i saspek olsem COVID-19 i kilim em tasol ol i pret long autim tigting bilong ol bikos gavman bilong Tanzania i tok i no gat COVID-19.

Gavman i tokim ol pipel long wasim han na bihainim ol rul bilong helt long stap helti na abrusim COVID-19. (Image copyright AFP)

Planti ol arapela family long Tanzania i bungim wankain hevi olsem Peter na family bilong em. Tasol ol i pret long tokaut bikos ol i pret long gavman i givim sampela mekim save long ol.

Gavman bilong Briten i stopim ol pipel bilong Tanzania long go long hap. Long US, gavman i givim strongpela toklukaut long ol pipel long no ken go long Tanzania.

Long Jun las yia, Presiden John Magufuli i tokaut olsem Tanzania “I fri long "Covid-19". Em yet  wantaim ol senia gavman opisa bilong em i no bisi long putim mask long pes o sapotim wok bilong testim ol pipel, na ol i tok bilas long ol arapela kantri husat i wok long bihainim nupela pasin bilong abrusim dispela vairus.

Mista Magufuli i tok lukaut tu olsem ol COVID-19 veksin i no seif. Em i tokim ol pipel long yu stimim ol yet na dringim ol hebs. World Health Organization (WHO) i no givim tok orait long yusim ol dispela samting olsem tritmen bilong COVID-19.

Gavman i tokim ol pipel olsem ol i mas stimim ol yet long stopim COVID-19, tasol i no gat evidens long sapotim dispela toktok. (Image copyright AFP)

Tasol nau Katolik Sios i wok long tokim ol pipel long bihainim ol rul bilong sefti na helt long stopim dispela vairus i kalap i go long ol pipel.

"COVID i no pinis, COVID i stap yet. Yumi no ken bikhet. Yumi mas lukautim yumi na stap seif, wasim han long sop. Yumi mas putim mask long pes gen," Bisop bilong Dar es Salaam, YudaThadei Ruwaichi i tok.

Seketeri bilong Tanzania Episcopal Conference, Fr. Charles Kitima, i tokim BBC Swahili olsem sios i wok long wokim planti moa ol funerel sevis long ol taun.

"Bipo mipela i save wokim tupelo misa bilong ol daiman long wanpela wik long ol peris long taun, tasol nau mipela i save wokim ol dispela lotu long olgeta de. Samting i no stret long dispela,” em i tok.  (BBC News)