PNG ekting Ilektoral Komisina, Simon Sinai i tok bai ileksen bilong Mosbi Not Wes bai kamap long dispela yia.

Em i tok dispela bai kamap long liklik taim long narapela mun.

Em i mekim dispela tok long dispela wik long bekim planti askim long watpo Komisin i laik holim bai ileksen long taim 2022 Jeneral Ileksen i kamap klostu pinis.

Wantaim dispela, askim i go long Komisin long soim rispek long Sir Mekere Morauta husat i bin memba bilong ilektoret tasol i dai i no longtaim i go pinis.

Sinai i tok Mosbi Not Wes i pablik opis na i mas i gat Memba i stap long makim ol pipel long palamen.

Em i tok 2022 Jeneral Ileksen bai kamap long Julai na de bilong Komisin i no ken holim narapela ileksen em wanpela yia pas.

Dispela de we ol ileksen i mas pas em Julai, em 5-pela mun i stap yet.

Long dispela as Komisin bai holim yet ileksen.

Em i tok em wok bilong opis bilong em long lukim kain wok i kamap bai i mas bihainim lo.

Long wankain taim em i askim ol manmeri long no ken kempen hariap long wanpela ileksen.

Em i tok i tambu long kempen bilong 2022 Jeneral Ileksen o long ol arapela ileksen olsem bai-ileksen bilong Mosbi-Not-Wes.

“Ol kendidet i kempen long ol ileksen bilong demokresi gavman long wol, dispela bai kamap bihain long ilektoral opis bilong ol i givim aut ol rit,” em i tok.

“Kempen hariap bipo long ilektoral opis i givim ol rit inap lukim yu i gat tok long brukim lo.

“Yu no ken kempen na givim aut ol kain kain samting long grisim laik bilong ol manmeri long vot long yu.

“Dispela em yu brukim lo aninit long tok bilong braiberi na tu ileksen i no fri na fea.”

Komisin i askim ol manmeri long ripot long ol lain husat i kempen hariap olsem em i ken save na givim tok lukaut na pasim ol.

Em i tok ol lain husat i mekim olsem inap kamap long kot aninit long Kot-ov-Disputet Riten sapos ol i win.

Anna Kavana Bais, Seketeri bilong Komyuniti Divelopmen, Meri na Yut long las mun i tokaut long resis long Mosbi Not-Wes bai-ileksen.

Em i risain tu long wok bilong em.