LLANE Munau em wanpela meri tasol i resis long Atonomus Rijon ov Bogenvil rijonal sia.

Em i stori long kaunting bilong dispela ileksen i bin olsem wanem.

Taim ol meri sapota bilong em i bin ring na askim, “Ol vot bilong mipela i go we?, em i bin kirap na stat long lukluk moa long ol kaunting i go olsem wanem.

Em i tok long Siwai moa long 60 meri i bin hairim kar na go long wanpela poling stesin long vot. Ol i tok em i taim yumi olgeta i votim wanpela meri.  Tasol taim ol opisal bilong kaunting i raitim ol namba i go antap Llane i kisim 14 vot tasol.

Em i askim, “Ol vot bilong ol 60 meri ya i go we? Ol meri i no save giaman. Ol meri i stap long sios felosip i no save giaman,” Llane i tok.

Taim Llane i stat sekim ol vot, ol grup i kamaut na askim yet, “Ol vot bilong mipela i go we? Ol yut grup tu i askim, “Vot bilong mipela i go we?”

Long ples bilong em long Saut Nagovis namba bilong ol pipel i no abrusim 700. Namba bilong ol vota em i tok i aninit long 250.

Tasol em i bin kalap nogut long lukim moa long 1,000 vot i kam aut long dispela ples na wanpela kendidet i kisim moa long 500 vot.

Llane i tok taim em i lukluk moa long rot kaunting i wok long kamap, em i tok long Saut na Not Nasioi, em ples bilong em, ol opisel bilong ilektoral komisin na OBEC i bin stop long kolim aut ol namba long ol skrutinia i ken save hamas vot  wan wan kendidet i kisim long wanpela eria. Ol i pasim tasol ol balot bokis na karim i go.

Taim ol skrutinia i askim, ol i givim ekskius olsem i no gat maka pen bilong raitim ol namba antap long yelo kenves, o no gat printa na ink.

Long opis bilong OBEC ol i givim ol wankain ekskius na bihain tru givim wanpela lista long Llane na tim bilong em.

Llane i askim ileksen em i kamap i bihainim stretpela rot o nogat? Proses em i stap ples klia?

Rosa Koian i raitim