ASISTEN Komisina bilong Polis na Divisenel Komanda bilong Nesenel Kepital Distrik na Sentral Provins, Anthony Wagambie Junior i laik lukluk long Hanuabada na ol viles long Motu Koita (MK) na stretim ol hevi bilong lo na oda.

“Mi gat strongpela tingting olsem bai mipela i ken stretim na menesim lo na oda hevi long Hanuabada na Motu Koita viles taim mipela sainim MOU,” Mista Wagambie i tok.

Em i tok taim em i kisim wokmak olsem Divisenel Komanda long 2019 em i bin bung wantaim Siaman bilong Motu Koita, Dadi Toka Junior long Novemba 2019. Em i harim toktok long ol hevi bilong lo na oda long Hanuabada na ol MK viles.

Wanpela pait i bin kamap namel long ol polis na ol manmeri long ples Hanuabada we planti i kisim bagarap na sampela i bin lusim laip. Mista Wagambie i tok, dispela pait i bin kamap bipo long em i kisim opis. Tasol em i tok, em i bin toktok wantaim ol manmeri long ples pinis olsem Kraims Dairektoret long Polis Hetkwata bai karimaut wokpainim long dispela hevi. Asisten Komisina bilong Kraim bai go pas long dispela wok.

Las yia 2020, ol i laik mekim dispela wokpainim na kamapim wanpela MOU, tasol COVID-19 i bagarapim plen bilong ol. Em i tok, Dadi Toka Junior i bin toktok gen wantaim Polis Komisina David Manning long dispela hevi na long kamapim wanpela MOU.

Metropoliten Suprintenden bilong NCD Gideon Ikumu na ol tim bilong en i wok, long dispela MOU nau. Long lukluk bilong ol polis, ol i no laik dispela MOU bai luk nais long pepa tasol, em i mas prektikal na inap long karim kaikai.

“Mi save olsem dispela MOU i redi nau long Komisina David Manning i sainim bihain long Legal Opisa bilong Polis i givim tok orait,” Mista Wagambie i tok.

Taim dispela i wok long kamap i stap, Mista Wagambie i tok wanpela yangpela man i bin lusim laip long las wiken long taim pait i kamap namel long ol yut long Hanuabada na Baruni. Em i tok dispela i soim olsem polis i mas mekim ol samting kwik na stretim ol dispela hevi hariap.