MINISTA bilong Infomesen na Komyunikesen Teknoloji, Timothy Masiu i tok strong long ol manmeri na pikinini long Papua Niugini olsem gavman bai no inap isi long saibakraim o ol lain husat i brukim lo bilong yusim intanet.

 Em i mekim dispela strongpela tok lukaut taim em i wok long strongim ol manmeri na pikinini long Papua Niugini long yusim gut intanet long gro na develop.

Em i mekim olgeta dispela toktok taim em i opim kempen bilong 2021 Seifa Intanet De long wanpela bung i no long taim i go pinis. Dispela kempen bai ron insait long mun bilong Februeri, 2021.

Long dispela bung, Hai Komisina bilong Briten long Papua Niugini, Keith Scott, i strongim sapot bilong Gavman bilong UK long PNG. Em i tok wanem program i kamap long sapotim PNG i mas inapim nid bilong ol manmeri na pikinini long PNG.

Ol lain husat i stap long dispela bung em CEO bilong NICTA, Kila Gulo-Vui, Seketeri bilong Dipatmen bilong Infomesen na Komyunikesen Teknoloji, Steven Matainaho, Hai Komisina bilong Briten Keith Scott na Global Embeseda bilong Get Safe Online (GSO) Peter Davis.