POLIS Komisina David Manning i tok promis olsem em bai yusim lo na risos bilong Konstabulari long holim ol polismanmeri husat i brukim lo na i wok long helpim ol raskol long brukim lo.

Mista Manning i mekim dispela tok bihain long ol polis ditektiv husat i stap insait long wokpainimaut bilong K286 milien mani bilong OK Tedi, i kisim sampela pret toktok long ol sampela lain.

“Tupela taim ol polis ditektiv i bin kisim ol pret toktok long sampela lain. Ol raskol na polis wantaim i bung na mekim dispela pasin. Mi bai no inap long sanap antap long dispela. Sapos yu wanpela raskol o polis husat i stap insait long dispela pasin, bai lo i mekim gut save long yu.

“Sapos yu laik kamap raskol o yu miks wantaim ol man o grup na salensim Polis Fos, yu no gat ples insait long Polis Fos. Bai mi yet rausim yu kwik taim long polis fos na salim yu go insait long haus kalabus,” Mista Manning i tok.

 Mista Manning i tok i gat ol ripot bilong ol polis opisa husat i wok long lukautim ol loging kemp o ol arapela praivet bisnis wantaim tok orait bilong ol bos bilong ol. Em bai mekim wokpainimaut na mekim save long ol. Long kain pasin tasol na ol risos na gan bilong polis i save go mekim wok long narapela hap na i no save yusim long helpim olgeta lain long wok bilong bringim jastis.

“Polis Fos bai go insait long sampela senis, na husat i wok long egeinsim ol dispela senis bai pinis long wok. Planti polismanmeri i save mekim gut wok bilong ol, tasol mipela na kantri i save kisim nem nogut bikos long pasin bilong ol dispela wan wan polismanmeri.

“Ol senis we bai kamap insait long disaplineri wok bai strongim wok long lukautim olgeta pati na strongim akauntabiliti na givim aut stretpela penalti.

“Long bihain taim bai mipela i kamapim ol lo we bai mekimsave long ol lain husat i bagarapim disaplin na pefomens bilong Polis Fos. Sapos mipela i laik givim gutpela Polis Fos long ol pipel bilong PNG na givim gutpela sevis bilong polis long ol, mipela i mas mekim ol dispela senis nau,” Mista Manning.