POLIS Komisina David Manning i salim bikpela tok sori bilong en i go long ol famili bilong 19 manmeri na pikinini husat ol i dai long Tari.

Em i tok promis olsem em bai mekim olgeta samting aninit long pawa bilong en long stopim pait na pinisim ol dispela pasin bilong kilim nating ol manmeri na pikinini.

Mista Manning i bin salim Ekting Deputi Polis Komisina na Sif bilong Operesen Donald Yamasombi na ol sinia opisa long Pot Mosbi i go long Tari bihain long em i harim olsem ol i kilim manmeri na pikinini las wik. Ol i bin go long Tari long painimaut wanem samting ol i bai mekim long bringim bel isi long Tari Distrik na Hela Provins tu.

Taim Mista Yamasombi i go kamap, em i go lukluk raun long sampela sevis bilong gavman insait long Tari taun, PNG LNG Hides 4 projek na ples balus long Komo.

Em i tok, “Ol hevi bilong lo na oda long kantri i bikpela salens bilong mipela. Mipela bai helpim long daunim ol kain kain lo na oda hevi long olgeta hap long kantri. Hela em i wanpela bilong ol.”

Mista Yamasombi i toktok wantaim polis long Hela na ol polisman i stap wantaim spesel operesen bilong PNGLNG long ol sampela rot long karimaut wok bilong polis long Hela provins.

Dairekta Spesel Sevis Divisen, Suprintenden Julius Tasion, ekting Dairekta Infomesen na Komyunikesen, Dennis Corcoran na ol sinia edvaisa long Australia Federal Polis i bihainim Mista Yamasombi i go long Hela.