MAUSMAN bilong Yunaited Nesen (UN) long kantri, Mista Gianluca Rampolla i singaut long pait i kamap long Hela Provins i mas stop.

“Dispela pasin bilong kilim indai ol manmeri na pikinini nating nating i mas stop nau yet, bipo long planti manmeri na pikinini i no gat asua i dai, kisim bagarap o lusim ples. UN i sanap wantaim Gavman bilong Hela na i redi pinis long helpim ol lain kisim bagarap long pait long nau yet,” Mista Rampolla i tok.

“Mipela i singaut long ol PNG Difens Fos na polis long helpim provinsal gavman long karimaut pasin bilong kamapim wanbel na bel isi na strongim sefti na sekyuriti bilong ol komyuniti husat i stap insait long dispela hevi.

“Long pinisim olgeta dispela pait, mipela i mas holim ol lain husat i kamapim dispela pait na putim ol long han bilong lo na tu inapim nid bilong ol lain husat i kisim bagarap olsem ol meri na pikinini,”em i tok.

Ol wokmanmeri bilong UN i stap long Intenesenel Ogenaisesen bilong Maigresen (IOM) i bung wantaim tim bilong Food and Agriculture Organisation (FAO) long Tari long Sarere las wik long kisim gut infomesen long namba bilong ol manmeri na pikinini i lusim ples, kisim bagarap, na dai na helpim long inapim ol nid bilong ol lain i lusim ples.

Gavana bilong Hela Provins, Philip Undialu i tokaut olsem i gat nid bilong sapot kwiktaim tru long ol selta bilong sotpela taim o giaman haus, kaikai na wara, na ol arapela samting olsem spun, plet, kap na sospen na ol samting bilong slip.

Disasta Menesmen Tim i sapotim Gavana Undialu wantaim ol sios, sivil sosaiti, praivet sekta, na ol divelopmen patna olsem DFAT long bungim ol samting long inapim ol dispela nid we Gavana Undialu i tokaut long en.

Dispela tu i ken strongim ol manmeri na pikinini husat i lusim ples.