WANPELA tim bilong World Health Organization (WHO) i stap nau long Saina long painimaut olsem wanem sik CODIV-19 i bin stat long Wuhan.

Ol i bin holim wanpela miting wantaim ol saintis bilong Saina las wik na i go lukluk raun long wanpela haus sik long Wuhan we ol i bin tritim ol namba wan lain husat i bin kisim COVID-19.

• Ol dispela investigeta bilong WHO i toktok wantaim ol dokta husat i bin tritim ol dispela sikman na meri long taim sik i kamap nupela.
• Gavman bilong Saina i putim bikpela was long dispela tim bilong WHO.
• Dispela tim i go lukim dispela pis maket long Wuhan we ol i bilip COVID-19 i bin stat.

Wuhan Jinyintan Hospital i bin wanpela bilong ol haus sik long dispela siti we tritim ol lain husat i bin kisim COVID-19 long begin bilong 2020. Long dispela taim ol doka na saintis i no bin kia yet long sik olsem na histori bilong sik i stap long dispela haus sik.

"Mipela kam bek long mipela lukim Jinyintan hospital, we ol i save tritim ol infekses disis na we ol i tritim namba wan keis bilong COVID-19 long Wuhan," Dutch virologist Marion Koopmans i tokaut long sosel midia,Twitter. Koopmans em i wanpela bilong ol WHO lain.

"Mipela harim wankain stori olsem dispela mi harim long ol ICU dokta bilong mipela," em i tok.

Zoologist Peter Daszak bilong US grup EcoHealth Alliance, husat i narapela memba bilong tim i tok, "Dispela em i impoten sans long toktok wantaim ol dokta husat i bin pait egnsim dispela sik long taim COVID-19 i kamap bikpela na wok long kilim moa pipel.”

Dispela WHO tim i tok las wik olsem bai ol i go lukim ol haus sik, na ol kain pis maket olsem Huanan Seafood Market we disepel sik i bin stat. Bai ol i go tu long Wuhan Institute of Virology, na lukim ol laboratori na ol fasiliti long Wuhan Centre for Disease Control.

"Ol saintis i kisim ol infomesen nau na bai ol i skelim long painimaut dispela vairus bilong sik COVID -19 i stat olsem wanem,” WHO i tok.

Gavman bilong Saina i wok long promotim bilip olsem dispela sik i bin kam long Saina long ol kaikai bilong frisa long ol ovasis kantri. Tasol ol saintis i tok dispela toktok i no gat as bilong en, bikos i no gat wanpela evidens i soim olsem ol vairus i ken kam long dispela rot.

Ol investigeta bai glasim gut tru Wuhan Institute of Virology. Dispela institusen em i wanpela top risets laboratori bilong Saina. Ol i bin snapim dispela institu long bugim na stadi ol jenetik infomesen bilong coronavirus em ol blakbokis i save karim, bihain long sik SARS i bin kamap long 2003.