SAPOS olgeta sios bilong ELC PNG i wok bung wantaim em bai ol lukim kaikai bilong wok we planti moa nupela Haus Lotu wankain olsem long Wakan bai kamap long olgeta hap bilong graun.

Minista bilong Graun na Memba bilong Lae John Rosso i bin mekim dispela tok long taim em i opim nupela Haus Lotu long Wakan. Dispela seremoni we i bin bungim olgeta ples olsem Yalu, Yanga, Hengali, Butibam  na olgeta papagraun bilong Aihi LLG.

Minista John Rosso i bin tok bikpela amamas long olgeta Kristen manmeri bilong Wakan sios bikos long pre na bilip bilong ol tasol na God i blesim ol wantaim dispela nupela haus lotu olsem na sanap strong wantaim bilip.

“Mi laik tok tenkyu tu long Aihi Invesmen Dairekta Mista Geroge Guware long go het na sapotim wantaim K100, 000 na Aihi Lig Opis K100, 000 na Wakan Luteren Kristen yet i bin bungim mani mak K1 21, 000. Ol arapela sapot bilong komyuniti i kam long, Hengali, Yanga, Butibum na Yalu. Na dispela i mekim mi amamas olsem memba bilong yupela,” Mista Rosso i tok.

“Mipela olgeta Kristen bilong Wakan wantaim ol yut tu i mas pulapim dispela haus lotu long tingim bikman long blesim mipela wantaim dispela nupela haus bikos em ples bilong mipela long strongim bilip bilong yumi wan wan,” em i tok.

Long wankain taim em olpela Memba bilong Makam na Deputi Praim Minista Andrew Baing wantaim bos bilong Aihi Invesmen George Guware tu i bin kamap long lukim dispela han mak bilong yuniti wok.

“Mi gat planti wok insait long Lae i stap we nau em ol go het wantaim olsem; Malahang polis stesin, Omil polis stesin na K2 milien konstraksen bilong Malahang bilding na dispela olgeta i kamap bikos Marape Gavman i laik wok bung wantaim ol pipel long bringim nupela sevis i go long olgeta provins,” Rosso i tok.

Bikpela salens em wok bung wantaim long lukim senis insait long komyuniti, sios na laip bilong yumi wan wan bilipmanmeri.

Paulus Tali i raitim