OL sistem na wok bilong ol gavman ogenaisesen long Morobe Provins nau i stap long lukluk na skelim bilong ol wokmanmeri.

Dispela em bilong mekim wok na sevis i kamap gut long ol distrik insait long Morobe Provins.

Morobe gavana Ginson Saonu i mekim dispela tok bihain long planti bel hevi toktok i bin kamap long ol rot na trenspot sevis bilong helpim ol fama i gat ekses long maket i no orait.

Gavana Saonu i tok tim na ol opisa bilong em bai wok hat long stretim ol wok we bai helpim ol pipel bilong Morobe.

“Planti yia i go pinis tasol ol wok i go insait long ol distrik i no kamap gut bikos sistem ino stret long halivim ol manmeri long ples,” Mista Saonu i tok.

Em i mekim dispela toktok  taim em i stap long witnesim SME Program Aawenes bilong Morobe Provins long Immanuel Lutheran skul.

Dispela SME program i sapotim tingting bilong gavman long strongim ol pipel bilong Papua Niugini long mekim bisnis.

“Mi tokim ol opisa long wok gut na onim long Nesenel SME na mekim isi long ol pipel bilong Morobe. Program bai karamapim ol kopret bisnis tu na ol mas rejista long kisim mani bilong mekim ol liklik bisnis,” Gavana i tok.

Em i tok gavman bilong em bai givim sapot baset bilong 2021 we bai helpim ol pipel bilong Morobe. Long wankain taim, Fainensel Litresi Trening bai kamap bilong strongim ol pipel long mekim bisnis.

Dispela tu bai helpim ol pipel long Morobe long baim moa guds na sevis takis long taim bihain.

Morobe Provinsal Strateji Aanalis Noah Ariku na tim bilong em bai go pas long mekim ol trening bilong fainensel, benking, baset.

Noah i tok ol freit sabsidi, prais sapot, maket na ol arapela bisnis we i gat veliu sein na saplai sein i stret pinis na i isi long ol SME long wok.

Carolyne Ketsimur i raitim