NU Ailan Provincial Executive Council (PEC) i apruvum Memorandum of Agreement (MOA) namel long National Statistical Office (NSO) na gavman bilong Nu Ailan.

Insait long dispela MOA ol i sainim tupela pati bai i bung na fandim wok bilong nesenel senses. Ol i apruvim K200, 000 long mekim wok long 2021 Nesenel Populesen na Hausin Senses long Julai.

Nu Ailan gavman i mekim wok bilong em yet long apdetim data bilong em yet aninit long Viles Rekot Buk bilong en. Na tu em bai sekim data bilong en wantaim bilong NSO.

Nu Ailan gavman i luksave olsem dispela wok bilong Nesenel Populesen na Hausin Senses long provins long 2021 em bikpela samting we em bai helpim ol long save long hamas ol pipel i stap long provins. Na ol Povinsel na Distrik na Local Level Government (LLG) bai mekim gut plen bilong gutpela sindaun bilong ol.

PEC i givim tok orait long Nesenel Populesen na Hausin Senses long statim wok bilong ol long Sande 11 Julai 2021. Em bai kamap olsem referens nait bilong namba 5 aniveseri bilong Nesenel Senses.

Dispela senses wok i stat leit bikos long COVID-19 pandemik i bagarapim olgeta plen bilong las yia.

Moto bilong dispela senses yia em “ i stap long Kaun! Nogat wanpela mas lus”.

Long go wantaim dispela senses, Viles Rekod Buk Rejista em aninit long seksen 57 bilong LLG mas kisim nem bilong olgeta manmeri na pikinini husat i stap insait long wan wan ples. Dispela bai mekim wok bilong NSO data bilong senses long yia 2021.