JIWAKA sensus kodineta Mary Tol i singaut long ol lokol lida long provins long sapotim wok bilong kauntim ol haus long Jiwaka.

Misis Tol i tok NSO i fandim trening bilong wok bilong kauntim ol haus long Jiwaka Misin Risot (JMR) tasol long wokim tru tru wok long Minj na Banz, nogat mani.

"Dispela wok bilong kauntim ol haus em i wanpela impoten wok we i kamap insait long kantri.

"Ol lokol atoriti olsem gavana na memba mas sapotim bikos ol data we i kamap long dispela lista bai i helpim gavman long plenim 2021 nesenel sensus na tu long wokim gut baset na plen bilong ol bikpela divelopmen we bai i kamap bihian.

"Ol lista bilong mipela we mipela i wok long kauntim namba bilong ol haus i nidim kar long wokabaut raun na tu kaikai long strongim bel.

"Listing bilong ol manmeri, wanem kain wok ol mekim, wanem kain haus ol slip, hamas mani ol kisim long potnait o maket, husat i wok na husat i skul. Long kisim kain ol infomesen em hatpela eksesais na i nidim mani," Misis Tol i tok klia.

Em i singaut long Gavana Dokta William Tongamp na ol tripela lokol memba Dokta Fabian Pok bilong Not Wagi, Wake Goi bilong Jimi na Joe Kuli bilong Anglimp Saut Wagi long lukluk long sampela ol wei long sapotim.

Nesenel sensus populesen na haus senses i stat long Janueri 29 na pinis long Februeri 3 long ol taun na eben eria tasol.

Nesenel sensus bai i kamap long Julai 11 dispela yia.

Hoffman Gulgarye i raitim