PANGU Pati na United Leba Pati (ULP) bai wok bung wantaim Morobe Provins na Papua Niugini olsem nupela pati long insait long gavman.

Deputi lida bilong Pangu Pati Gavana Ginson Saonu i amamas long wok bung wantaim pati lida bilong ULP na Deputi Praim Minista Sam Basil.

Dispela ol sia insait long nupela pati ULP em ol Pangu pati yet i pulimapim long Morobe. Ol dispela sia em Ginson Saonu bilong Morobe Rijinol sia, John Rosso bilong Lae Open , Rainbo Paita bilong Finschhafen Open, Dokta Kobby Bomareo bilong Tewai- Siassi Open,  na Benjamin Philip bilong Menyamya Open.

“Tenkyu long Sam Basil long kamapim Pangu Pati long Morobe Provins nan au em kirapim nupela pati bilong Morobe na kantri em ULP,” Gavana Saonu i tok.

Saonu i tok tupela pati, Pangu Pati na ULP bai wok bung wantaim olsem pos long senisim kantri long taim ULP bung  i bin kamap long Mapos Viles long Bulolo Distrik.

Dispela kain ol pasin bilong wok bung wantaim i soim wanpela strongpela tingting tasol em soim ol lida i tingim gutpela bilong ol pipel bilong ol.

Gavana Saonu i tok Pangu Pati i redi long holim Nesenel Konvensen bilong ol long Lae long mekim ol pipel bilong Morobe olsem lida bilong ol laik kisim bikpela senis kam insait long provins na kantri tu.