GAVANA Jenerel Sir Bob Dadae wantaim meri bilong em Ledi Esmeline, i bin bungim na tok welkam long olgeta wokman na meri bilong Gavmn Haus long Mande 1 Februeri.

Long dispela taim Sir Bob i tokaut tu long ol wok i kamap pinis, ol wok i gohet na ol nupela plen bilong em long dispela yia. Em i tok las yia, COVID-19 i bin givim bikpela salens long kantri na ol pipel. Em i tok olsem dispela sik i no bin bgarapim PNG tasol ol pipel i mas luksave olsem helt bilong ol i impoten na ol i mas biainim ol nupela pasin bilong stap helti.

Em i tokim ol opisa bilong Gavman Haus long stap strong long wok bilong ol na mekim gut wanem kain wok ol i holim insait long dispela hap.

Sir Bob i tok bihain long 30 yia, ol i stat nau long sanapim banis raun long Gavman Haus na putim ol sekyuriti lait. Wok i stat nau na bai pinis long dispela yia.

Wok i gohet long dupleks haus slip bilong ol wokman na ol i plen long sanapim tri o foapela moa long dispela yia.

I gat plen bilong wokim Dadae Track na NCD Gavana wantaim Menesa i klia long dispela plen na ol i wet tasol long kisim tokorait long dispela projek i stat neks yia.

Sir Bob Dadae i tokaut tu long plen bilong gavman long stretim ol matmat bilong ol olpela gavana jeneral.

Em i tok ol i luksave pinis long matmat bilong Sir Tore Lokoloko, Sir Serei Eri na Sir John Guise. Ol kontrakta i go lukim ol dispela matmat pinis na bai givim disain na kost bilong ol wok long stretim gut ol dispela matmat.

Sir Bob i tok Kopret Plen bilong Gavman Haus i ekspaia pinis na bai ol i wokim nupela Kopret Plen bilong 2021 – 2026. Bai i gat ristraksa bilong ol wokman na meri insait long dispela plen. Opis bilong GG bai wok klostu wantaim Dipatmen bilong Pesenel Menesmen long wokim dispela Kopret Plen.