Nesenel Stetistikel Opis (NSO) i bai yusim Straksarel Lista Eksesais long mekim senses bilong dispela yia 2021 na redi long ileksen tu.

Dispela wok senses em bai mekim gutpela kontrol rot bilong ranim gut senses bilong dispela yia. Astingting bilong dispela Straksarel Lista Eksesais em long painimaut hamaspela pipel slip insait long wanpela haus.

Long 11 Julai ol senses tim bai raun long dispela taim na kisim namba bilong hamas pipel i save slip insait long wan wan haus insait long PNG. Ol pipel husat i bon bihain long dispela de bai no inap stap long senses buk taim ol i mekim senses pinis.

NSO i putim K5-6 milien baset long mekim dispela wok bilong senses.

Deputi Senses Dairekta Mista Josiah Joseph i tok ol opisa bai go long wan wan haus na kisim namba bilong hamas manmeri na pikinini i slip, kirap long haus na husat em papa bilong haus. Na kain olsem ol rent haus, hotel, dometri bilong skul na ol narapela kain ol haus we ol i save baim mani na slip em ol opisa bai askim tu wankain askim.

Ol opis bilong em i redi na ol i statim wok pinis na bai pinis long arere bilong Februari o Mas. Ol i bin kisim trening bilong ol long hetkwata bilong wan wan provins bilong ol.

Long dispela senses we ol bai mekim 40 tausen manmeri bai wok wantaim ol NSO long mekim Eksesais.

Ol i laik mekim dispela eksesais bilong wanem long bipo i no bin gat planti manmeri tasol nau em ol manmeri i kam long taun na mekim haus antap long graun wea man i no save stap long em long bipo. Na tu go kauntim manmeri na pikinini long haus bai isi long mekim senses, Mista Joseph i tok.

UPNG Jenelis Sumatin Martina Takaneng i raitim