WANPELA polisman long bipo i singaut long Wes Nu Briten Provinsal Gavman na bisnis komyuniti long Kimbe long helpim ol polismanmeri long lukautim ol lain i wet kot long polis sel.

Kingsford Mahuvu i tok taim em i bin raun long polis stesin las wik, em i lukim ol polismanmeri i bungim mani long poket bilong ol long baim kaikai bilong ol lain i stap long polis sel.

Mista Mahuvu i tok samting olsem 30 o 40 manmeri i stap long sel wetim kot na ol i hangre. Na polis stesin i no gat kaikai long lukautim ol.

Ol polismanmeri i bungim mani na baim rais, tinpis na aibika na kukim na serim wanpela wanpela spun  long ol. Polis stesin i no gat ples bilong kuk tu tasol ol polis opisa i save painim rot na helpim.

Em i askim gavman bilong Wes Nu Briten, “We stap kaikai bilong ol dispela lain? Na polis i gat baset bilong kaikai bilong ol tu?”

Sampela dispela ol lain i wet kot i save stap inap 7-pela de na dispela i min sampela mani mak. Polismanmeri i traim long helpim tasol planti taim ol i save sot na 7-pela de em i longpela taim tumas long ol lain i stap nating na no gat kaikai.

Mista Mahuvu i tok taim ol atoriti i lus tingting long lukautim ol lain i wet kot, ol i abiusim rait bilong ol man na meri i stap insait long sel na tu givim moa wok long ol polis opisa.

Bihain long Mista Mahuvu i tokaut long Facebook long dispela hevi San Remo Club na wanpela bisnis haus long Kimbe i bin kam wantaim sampela helpim. Mista Mahuvu i singaut long ol komyuniti long Kimbe tu long helpim.