MILEN BE Provinsel Edministreta na Deputi Siamen bilong Provinsel Lo na Oda komiti Ashan Numa i tok aninit long ol lo bilong trenspot atoriti, pis na gutpela sindaun na kriminel kod mipela bai senisim Milen Be provins.

Dispela em sampela ol senis i go wantaim rot bilong stopim sik COVID-19 na sampela ol kriminel pasin long provins.

Ol lida bilong Milen Be i holim dispela miting long Sarare 24 Janueri na i pasim tok long kamapim ol senis insait long komyuniti.

Namba wan toktok em nogat wanpela man, meri o pikinini bai raun o kisim sip na go long solwara long 6 klok long nait i go inap 6 klok long moning.

Aninit long Milen Be provinsel Trenspot Atoriti Ekt 2009, husat man o meri i sakim dispela tok na i no bihainim oda ol atoriti bai rausim laisens bilong ol na bai ol i lokim sip bilong ol.

Na tu olgeta manmeri husat gat sip mas toksave long raun bilong ol long provinsel trenspot atoriti long 8 klok long moning na bihain long olgeta 4-pela aua. Ol papa bilong sip tu mas soim atoriti pepa bilong wanem samting ol salim antap long solwara.

Ol polis na trenspot atoriti bai sekim olgeta manmeri husat i kam insait long provins na husat i go autsait long provins.

Namba tu toktok em ol provinsel polis na Provinsel Kontrol Senta bai wok bung wantaim na kamapim operesen tim long wok long Lo na Oda operesen.

Sapos ol pipel i lukim olsem ol man i mekim samting i no stret, ol i mas ringim dispela namba 6411886 o 71162447 na toksave long Provinsel Kontrol Senta o Alotau polis stesin long dispela namba 6411222.

Namba tri toktok em long taim bilong sik na klostu indai na long taim long COVID-19 keis tasol bai ol atoriti bai helpim yu na bai yu ken kisim helpim long dispela taim.

Na laspela toktok em ol polis na provinsel trenspot atoriti bai kamapim dispela oda na olgeta manmeri na pikinini insait long Milen Be mas bihainim long aburusim hevi,  Numa i tok.

UPNG Jenelis Sumatin Martina Takaneng i raitim