Praim Minista James Marape i bai pait egensim korapsen insait long kantri.

Dispela Commission Against Corruption (ICAC) Ekt ol bin pasim long Haus Palamen long 12 Novemba bai kamap olsem samting bilong sapotim tingting bilong egensim pasin no gut.

Praim Minista Marape i tok long stopim dispela pasin bilong korapsen long opim bilong Transparency International PNG (TIPNG) 2020 Corruption Perceptions Index (CPI) long Pot Mosbi long ai bilong Sif Jastis Gibbs Salika, Polis Minista William Onglo, Seketeri bilong Praim Minista na Nesenel Ekjeketiv Kansel Ivan Pomaleu, Polis Komisina Mike Minning, TIPNG Semen Peter Aitis na ol narapela ol stakholda bilong TIPNG.

Long 2020 ripot bilong TIPNG i tok PNG em stap long 142 mak namel long 180 ol kantri we korapsen pasin i stap.

Marape  i tok em na gavman bilong em i bai wok wantaim Transparency International na ol narapela ejensi bilong kantri husat wok long helpim long go egensim korapsen long pinisim dispela pasin insait long kantri bilong yumi.

Dispela tingting bilong givim pawa long ICAC long kantri em long putim ol manmeri husat i save mekim korapsen pasin na bagarapim kantri em bin stat long yia 1980 kam nau 2020 ol i laik yusim Whisttle Blowers Act long pinisim pasin bilong korapsen, Marape i tok.

Olsem ol gavman save mekim tok piksa na tok, “Sapos i no nau, em wanem taim, sapos i no mi, em husat” we ol i bai yusim long stretim dispela kain ol hevi olsem korapsen.

Marape i tok korapsen i no pasin bilong brukim lo o sosel hevi tasol, long lukluk bilong ikonomi bilong kantri korapsen tu em wanpela samting tu we i soim olsem Papua Niugini i wok long salim planti ol risoses bilong yumi na nogat senis long ikonomi na kantri bilong yumi.

Wantaim Whistleblowers Act na ICAC Act gavman bai wok strong long rausim pasin korapsen insait long kantri bilong yumi, Marape i tok.

UPNG Jenelis Sumatin Martina Takaneng i raitim